SAKOP sa usa ka fraternity ang gitabangan pagkulata ug gidunggab-patay sa mga miyembro sa kaatbang niining fraternity niadtong sa Barangay Poblacion, lungsod sa Compostela, Sabado sa kaadlawon, Agusto 10, 2019.
Ang biktima giila nga si Lenie Ochea Noval, taga Barangay Basak, lungsod sa Compostela, nga nakaangkon og dinunggaban sa lawas.
Matud ni Police Captain Ian Macatangay, hepe sa Compostela Police Station, gikan nangaon sa usa ka barbecue-han ang biktima kuyog ang iyang higala ala 1:30 sa kaadlawon niadtong Sabado.
Sa dihang mopauli na unta kini sakay sa iyang motor, kalit lang nangabot ang grupo sa mga lalake ug gibabagan ang biktima sa gibana-bana napulo ka mga tawo.
Gitabangan og pagkulata ang biktima nga si Noval. Nakahigayon pa siya sa pagdagan apan gigukod kini hangtod nga siya nadagma.
Usa sa mga suspek nga giila nga si Joshua Canlas, 27, taga Barangay Poblacion, Compostela ang mikuha sa iyang kutsilyo ug giingong gidunggab ang biktima sa dughan.
Dali nga misibat ang mga suspek samtang ang biktima gisakay dayon sa ambulansya sa lungsod ug gidala sa Danao City District Hospital apan gideklara siya nga dead on arrival.
Matud ni Macatangay nga human mailhi ang suspek, ila dayon nga gilusad ang follow-up ug manhunt operation.
Nakadawat sila og impormasyon nga misibat kini paingon sa Dakbayan sa Sugbo ug naa sa Barangay Inayawan.
Tuod man, alas 2:42 Sabado sa hapon nasikop nila si Canlas.
“Ang motive ani kay frat rivalry. Kining victim sakop sa Akrho unya kining suspek, Crips. Kaadlawon nahitabo ang pagdunggab unya misibat. Mao 'to atong gi-hot pursuit ug nadakpan dayon ang suspek,” matud ni Macatangay.
Nagpadayon ang pagpanguha og kasayuran ang Compostela police sa mga saksi kon kinsa pa ang mga kauban sa suspek nga mao'y nagtabang sa pagkulata sa biktima.
Aduna'y tulo ka mga saksi ang kapulisan nga giingong makatudlo kang Canlas nga mao gyud ang midunggab ni Noval tumong sa dughan. (Superbalita Cebu)