ANAK sa city administrator sa Dakbayan sa Tagbilaran, Bohol nasikop sa gilusad nga joint buy-bust operation sa National Bureau of Investigation (NBI) Bohol ug Philippine Drug Enforcement Unit (PDEU) Bohol sulod sa usa ka hotel alas 9 sa buntag, Dominggo, Agusto 11, 2019.
Ang dinakpan giila nga si Eric John Borja, 26, nagpuyo sa Dakbayan sa Tagbilaran.
Matud sa abogado nga si Rennan Oliva, ang head sa NBI Bohol, ilang napalitan og duha ka tabletas sa ecstasy ang suspek.
Dugang ni Oliva nga duha ka buwan nila nga gipanid-an si Borja human makakuha og impormasyon labot sa ilegal nga kalihukan niini.
Giingong lisod dakpon ang suspek tungod dili kini mohatag sa bisan kinsa lang nga mopalit.
Iyang mga higala ug mga barkada nga susama niya og pangidaron ang kasagaran niya nga customer.
Atol sa buy-bust gitunol ni Borja ang duha ka tabletas sa ecstasy nga mobalor sa P1,500 ang matag usa.
Lakip sa nakuha ang laing lima ka tabletas nga wala pa mahalin sulod sa iyang lawak sa giabangang hotel.
Sa paghiling sa cellular phone ni Borja, nasuta sa NBI ug PDEU nga gikan sa Dakbayan sa Sugbo ang iyang suplay sa ecstasy nga mao usab ang ilang gipaubos sa imbestigasyon.
Gihimakak hinuon sa suspek nga namaligya siya og ilegal nga drugas ug ang ecstasy nga nakuha gikan kaniya, matud pa, iya rang konsumo.
Nakurat matud pa ang amahan nga mao'y city administrator sa Tagbilaran sa pagkasikop sa iyang anak sanglit wala siya masayod nga nalambigit kini sa ilegal nga drugas. (Superbalita cebu)