MIABOT na kagahapon sa Tagbilaran City, Bohol si undefeated boxing star Mark “Magnifico” Magsayo ug ang iyang team nga masaligon sa iyang umaabot nga away batok sa beteranong si Panya Uthok sa Thailand sa “Pride of Bohol” boxing promotions nga ipahigayon sa Wisdome Gymnasium karong Agusto 31.
Masaligon si Magsayo nga iyang mapukan Uthok aron langkaton ang bakanting World Boxing Council Asia ug International Boxing Federation Pan-Pacific featherweight titles.
Si Uthok kinsa adunay record nga 53-6, 35 KOs, mao si kanhi Pungluang Sor Singyu Onesong, ang mipildi AJ Banal, stablemate ni Magsayo kaniadto sa Ala Boxing Gym, sa usa ka WBO bantamweight world title bout niadtong 2012 didto sa Mall of Asia Arena sa Pasay City.
Kini maoy unang away og balik sa 24 anyos nga Bol-anon sa iyang hometown sukad sa iyang unanimous decision nga kadaugan batok sa haponanon nga si Shota Hayashi niadtong Nobiyembre 2017 sa WBO International featherweight title.
Ang wala pay pildi nga Magsayo nga karon ubos na sa Vladimir Boxing Promotions adunay 19 ka daog ug 14 ka knockout.
Gipadayag ni Magsayo ang iyang kalipay nga nakaaway ug balik atubangan sa iyang mga katagalungsod. Iyang gipanaad nga dili gyud niya pakyason ang iyang mga paysano ning maong away nga giabagan usab sa Tagbilaran City government.
“Handang-handa na ako sa laban. Pipilitin ko talagang manalo para sa mga kababayan ko sa Bohol,” matod ni Magsayo atol sa usa ka press conference didto sa Kaulohan sa niaging semana.
Sa pagkakaron, sobra pa og 8 lbs. sa iyang timbang si Magsayo, apan, matod sa iyang asawa nga si France, nga dili kini problema sanglit aduna pay duha ka semana kapin sa dili pa ang away. (JBM)