Reed, Steffen, hari ug hara

ASIAN CHAMP: Si Nikko Huelgas sa Philippines nga nagselebrar sa iyang pagtabok sa finish line aron sakmiton ang kampiyonato sa Asian Elite Class sa Regent Aguila Ironman 70.3 Triathlon nga gipahigayon sa Shangri-Las Mactan Resorts and Spa. (Alan Tangcawan)
ASIAN CHAMP: Si Nikko Huelgas sa Philippines nga nagselebrar sa iyang pagtabok sa finish line aron sakmiton ang kampiyonato sa Asian Elite Class sa Regent Aguila Ironman 70.3 Triathlon nga gipahigayon sa Shangri-Las Mactan Resorts and Spa. (Alan Tangcawan)

DUHA ka buwan gikan makalabni og titulo sa Ironman 70.3 didto sa Subic, sa makausa pa, si Tim Reed sa Australia ug Caroline Steffen sa Switzerland mipakita na usab og saktong dominasyon human kini mipatugbabaw sa 2019 Regent Aguila Ironman 70.3 nga gipahigayon kagahapon sa Shangri-La Mactan Resort & Spa sa dakbayan sa Lapulapu.

Si Reed, sa men’s division, nagkinahanglan pa og ayuda ug suporta gikan sa iyang mga dumadapig sa katapusang mga minuto aron moabot sa finish line aron dili kini maapsan sa nagkaduol na unta nga si Mike Philips sa New Zealand nga maoy naghingpit sa iyang kadaugan sa maong lumba nga milatas og 1.9-kilometer nga langoy, 90-kilometer nga biseklita ug 21 kilometer nga dagan.

Kini sukwahi sa gihimo ni Steffen sa women’s class kinsa wa gyud makabaton og pagpanghudlat gikan sa sinugdanan hangtod na sa katapusang bahin sa kompetisyon nga giorganisar sa Sunrise Events, Inc. Iyang gibiyaan ang higpita nga kaatbang nga si Dimity Lee Duke sa Australia og 12 minutos.

Sila karon ang giilang hari ug hara sa triathlon sa tibuok kalibutan. Si Reed aduna nay upat ka titulo sa dihang miharos siya sa 2015, 2016 ug 2017 nga mga edisyon samtang kini usab ang ikaunom nga kampiyonato ni Steffen sa walo pagpahigayon sa Ironman 70.3 sukad sa 2012 hangtod sa 2016.

Dihay usa ka higayon nga wala siya kasalmot tungod kay nanganak kini ug sa niaging tuig usab igo lang siyang na-second sa Czech nga si Radka Kahlefeldt kinsa wa usab makadepensa sa iyang korona kagahapon tungod sa sakit.

Sa kinatibuk-ang, si Reed mitapos sa rota sulod sa 4:01:22. Dili halayo nga nagsunod kaniya si Philips sa oras nga 4:02:09 ug ikatulo ang taga Australia nga si Tim Van Berkel (4:03:12).

Si Steffen, sa iyang bahin, mioras usab og 4:24:10. nagsunod si Duke sa oras nga 4:36:48 ug ikatulo ang Aussie nga si Courtney Gilfillan (4:39:18).

“I just love the place. If you feel happy with the place you race well and the six wins speak for itself,” matod ni Steffen. “I love the heat, everything and I look forward to come back here. I keep saying that it’s one of my favorite races but it’s not true...because this is my favorite.”

Si Nikko Huelgas ug Alexandra Ganzon, mao usab ang mipatugbabaw sa Asian Elite division. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph