HUGYAW na gyud ang Siyudad sa Davao.
Usa ka pagpamatuod nga nagpungasi na ang mga kalihukan sa 34th Kadayawan Festival.
Ang selebrasyon sa abundang ani, kultura ug tradisyon, di makumpleto kun wala ang nagbahang prutas, sama sa King of Fruits nga gikahinaman sa kadaghanan, apan aduna say daw mahadlok sa baho niini.
Niadtong Biyernes, Agosto 9, nagbukas ang 7th Durian Festival nga siguradong paraiso alang sa mga mahiligon sa durian.
Ang kalihukan diha gihimo sa Northwing Ground sa SM Lanang Premier, Lanang ning siyudad nga gitambungan sa mga kadagkuan sa Department of Agriculture Davao Region, lokal nga opisyales sa siyudad, kadagkuan sa SM Lanang Premier, bisita ug uban pa.
Ang Durian Festival molungtad og usa ka bulan, mahuman Septyembre 9, diin highlight dinhi ang P180 nga “Durian Buffet.”
Suma pa lauman ang pag-ubos sa presyo niini sa mosunod nga adlaw, ilabi na sa pagdagsa sa daghang suplay sa maong produkto.
Mga exhibitors nga nag-displi sa ilang lamiang variety sa Durians mao ang Cubol Farms, Ronald Renato Fermin Farm, Ben Musa Farm, Eng Seng Food Products, John and Jing Fruits ug De Vera Farms nga pulos gikan sa Calinan ug miyembro sa Davao Durian Industry Association Council (DIADC).
Luyo sa durian, magpiyesta sab ka og kaon sa ubang prutas sama sa mangosteen, lanzones ug uban pa nga nagbaha sab sa kasamtangan.