UPAT ka adlaw nga gipatak-upan sa atong Presidente Rodrigo Duterte ang operasyon sa Lotto ubos sa Philippine Charity Sweepstake Office (PCSO), tungod sa mga anomaliya, sama sa Peryahan ng Bayan ug Small Town Lottery (STL).
Sa atong pagpaniid, ingon sa nagbangutan ang katawhan nga kalit nawala ang ilang inad-adlaw adlaw nga gikalingawan nga mao ang sugal.
Sa laktud nga pagka-estorya kun hunongon sa gobyerno ang legal nga sugal, mangita gyud ang tawo og sugal, ma-legal man o ilegal, tungod kay kultura na sa mga Pilipino ang pagka-sugarol.
Human sa upat ka adlaw nga pagkahunong sa operasyon, nanaad ang atong presidente nga ibalik lang niya ang operasyon kun manganlan kinsa ang dakong tawo nga mao’y responsable sa pagsuyop sa gikita sa Lotto.
Apan hangtud karon nga gibalik na ang operasyon wala ma’y usa o duha ba ka tawo nga maoy bugtong manubag sa kasal-anan?
Nindot nga paagi sa atong presidente nga gibutangan og STL ang matag dapit sa nasud, aron patyon ang mga nag-finance sa ilegal nga padula nga “last-two.” Tungod kay minilyon ang gikita niini ug nasuta nga walay buhis nga gihatag sa atong gobyerno.
Paghibalik sa Lotto draw sa PCSO niadtong Hulyo 31, nagpabiling sirado gihapon ang mga STL outlets; nanggimok gilayon sa pagbalik ang mga ilegal nga mga financiers sa last-two, ug daghan na sab ang ilegal nga nakahimulos.
Sa kumon nga panghunahuna, mas maayong ibalik sa atong presidente ang operasyon sa STL kay adunay dugang salapi nga ikatabang niini sa mga nagkinahanglan og mga tambal ug sa mga pasyente sa ospital.
Kun mabalik na ang operasyon sa STL, unta adunay maniid, aron masakpan ug masikop kining mga tawo nga ilegal nga mihimulos sa kita.
Apan ang problema lang, hangtud karon, walay tima-ilhan nga mabalik ang STL. Sa Davao lang, mokabat sa 400 ka mga nagtrabaho sa mga STL outlets ang nawad-an og trabaho kinsa nagpaabot kun kanus-a ibalik ni Duterte ang operasyon.
Karon kay mingbalik naman sab ang mga last-two financiers nga mikita og minilyo ug wala mibahin sa kita ngadto sa gobyerno, nan asa man ta, sa sugal nga makinabang ang daghang tawo sama sa pagpangayo og hinabang sa PCSO o didto sa mga last-two ushers nga gitahan sa mga ilegal nga financiers?