ANG actor nga si Karlos Lorenzo “Kenzo” Gutierrez, 22 ang gidakop sa mga sakop sa Makati City Police niadtong kadlawon sa Agosto 10 sa dihang gireklamo nga nakigkarambola sa laing customer sa usa ka bar sa Paso Tamo, Makati.
Nasayran nga si Kenzo kanhi housemate sa Pinoy Big Brother teen edition niadtong 2015 nga nagdala sa tag name nga “Astig Athlete ng Quezon City”.
Matod pa ni Major Gideon Ines Jr., Makati Police Investigation Unit chief nga nagdumili sa pagsanong sa responding policemen ang actor nga gihulagway og hubog ug suway nga misuhol ngadto sa arresting officers.
“Our policemen were offered P2,000 each. They were about to arrest him as he was engaged in a fight inside a bar,” saysay ni Ines sa GMA News.
Kuha sa footage nga gibalikas sa actor ang desk officer sa dihang gidala na sa police station pinaagi sa paghingalan og “p*ta kayo” ug nanulong pa og sinukmagay sa mga pulis nga mibadlong kaniya.
Apan pagkasunod adlaw sa dihang nahuwasan sa iyang kahubog gusto nga mangayo og pasaylo si Gutierrez sa iyang nahimo ug mipasabot nga pwerti lang gyud niyang hubaga niadtong higayona.
Kasong alarm and scandal, resistance and disobedience to a person in authority ang gi-atubang ni Kenzo. (B)