MAGUINDANAO -- Gi-angkon ni Maguindanao Second District Representative Esmael “Toto” Mangudadatu nga nag-andam na sila sa posibling mahimong desisyon sa korte batok sa mga suspek sa masaker niadtong Nobyembre 23, 2009 sa Sitio Masalay, Barangay Salman, Ampatuan Maguindanao.
Gikonsiderar nga pinakangilngig nga kremin ang masaker sa Ampatuan sa wala pa ang piniliay ug pinaka-grabe nga ihap sa nangamatay nga miyembro sa media.
Muabot sa 58 ka tawo ang niluog nga gipatay apil na ang 32 ka sakop sa media. Gatusan ang gi-akusar sa kaso, apan 111 ra ang gidakop ug nataral sa korte.
Ang prosekusyon adunay 147 nga mga saksi, samtang ang depensa adunay 300.
Alang kang Mangudadatu, nagsalig sila sa gibug-aton sa mga ebidensya ug pamatuod sa ilang mga saksi.
Hinuon, wala nila hunahunaa nga adunay mga higayon nga gipaboran sa korte ang mga suspek samtang gitaral ang kaso.
Samtang, emosyonal ang mga pamilya sa mga biktima sa Maguindanao Massacre diin sagol ang ilang gibati sa taliabot nga pagpagawas sa desisyon sa korte sa kontrobersiyal nga kaso.
Gikanayon ni Emily Lopez, presidente sa Justice Now Movement, malipayon kaayo sila tungod kay human sa 10 ka tuig, ang korte hingpit nga magpagawas og desisyon sa mga tawo nga gilambigit sa mangilngig nga krimen. (Edgar Fuerzas0