MOPAHIGAYON og refund ngadto sa mga investors ang Rigen Wellness 2.0 ug ilang gipaklaro nga walay kaltas ang ilang kapital luyo sa nanggawas sa social media nga kaltasan gikan 20 hangtud 30 porsiyento.
Subay sa Facebook page sa Rigen Wellness 2.0 ilang gipahibalo nga mopahigayon sila og refund nga himuon karong Agosto 15, 2019, Huwebes.
"Ang Rigen Wellness 2.0 kay magpahigayon og refund schedule karong August 15, 2019. Ayaw mo padala sa mga impormasyon nga ginapasa karon sa social media nga ang refund kay naay 20 porsyento ngadto sa 30 porsyento nga kaltas tungod kay dili kini tinuod," tipik sa post sa ilang Facebook page.
Dugang pa, “Ang refund kay magsugod sa August 15, 2019. Magpaabot ra ta og text, palihog, aron dili magkayagaw sa adlaw sa pagsugod sa refund. Dili tanan sabay sabay mahatagan og refund anang adlawa.”
Wala sab gikabutyag sa pahibalo kun asa ang lugar diin ipahigayon ang pag-refund.
"By batch ang proseso sa refund sa Huwebes. Magpaabot ta og text or tawag nga gikan sa official number sa management," dugang sa pahibalo.
Sumpay sa pahibalo, “Ang mga nakadawat og text, palihog kamo ra ang moadto sa lugar kun asa i-release ang refund kay kamo ra ang i-cater sa management. Palihog dili magkayagaw sa venue aron hapsay ang pag-release sa refund.”
Una niini, nabulabog ang daghang money investment schemes sa Davao Region human mimando si Pangulong Rodrigo Duterte nga mopahigayon og imbestigasyon ang otoridad labot niini.
Luyo sa imbestigasyon, daghan ang mga nanglayas nga mga nagpasiugda sa mga investment schemes butang nga daghang mga investors ang nangasuko kinsa nanulod sa mga balay nga gihimong opisina sa pipila ka investment groups dayon gipangdala ang mga gamit.
Sa ulahing impormasyon nasayran nga duna nay mga kaso nga napasaka ang otoridad batok mga investment groups ning rehiyon.