SECTIONS
Monday, September 23, 2019
SUPERBALITA CEBU

Nadela: Pangandam alang sa sunod nga gale warning

KINSAY nagtoo nga tungod sa gale warning nasugamak sa dakong puwerhisyo ang taga isla sa Olango sa nakalabay nga mga adlaw. Di ni bag-o nga kasinatian. Ang atong mga igsoong Bol-anon dugay na nga gihulga ning maong matang sa lakat sa panahon.

Di na maihap ang gidaghanon sa mga pasahero ang natanggong sa mga pantalan sa higayon nga ideklarar sa Pag-asa ang gale warning.

Kong mahitabo kini apil nga maapiki ang panginabuhi sa natanggong nga mga pasahero. Samot na kong apiki sa budget , dakong gutom ang moataki.

Mao nga atong gidayeg ang ayuda nga gitunol sa kagamhanang lokal sa siyudad sa Lapulapu sa mga na-stranded nga mga pasahero para sa Olango. Ambot kong mao ba ni gihimo sa ubang mga pantalan.

Tungod ning maong sitwasyon mangutana ta sa taga Department of Social Welfare and Development kun DSWD, naa ba silay programa pagtunol og pagkaon sa mga stranded nga pasahero?

Pasabot automatic na nga molihok ang mga local social welfare office pagsusi sa mga pantalan, bus terminal ug airport kong may kakulian sa panahon.

Kinahanglan pa ba nga mamukaw ang gipang gutom nga mga pasahero?

Bisan diha sa mga eskwelahan. Pananglit matanggong ang mga bata sa eskwelahan tungod sa dautang panahon, kinahanglan nga may pagkaon nga i-supply ang principal. Wa pa koy nadunggan nga report nga gihimo kini.

Kadaghan na mahitabo nga di dayon makapauli ang mga bata unyag buhi sa hapon tungod sa dautang tiyempo. Pero way libreng pagkaon nga masimasima. Ang canteen ray mabulahan alang niadtong dunay ikapalit.

***

Sa atong asoy sa niaging Sabado nahisgutan nato ang fire ug earthquake drill diha sa mga eskwelahan.

Si Edgardo Tiro usa ka street sweeper sa Department of Public Services sa Cebu City government, usa sa mosanong sa atong panawagan nga maghimo og mga bag-ong diskarte labot ning maong drill. Ang iyang apo nga si Alyzza nga nag eskwela og Kinder sa Pardo Elementary School iyang gipalitan og hard hat.

Matod niya inay libro ug notebook ang itabon sa ulo, gusto niya nga ang hard hat maoy mosagang kong dunay matagak sa ulohan.

Si Edgardo, ulitawo, nga taga Barangay Kinasang-an dul-an na sa baynte ka tuig nga nag-alagad isip tigpanilhig sa dalian Colon. Upat ka tuig ang nakalabay niabot sa iyang kinabuhi si Alyzza.

Si Alyzza nahug nga iyang apo kay anak man ni sa iyang pag-umangkon. Siya ang nagsilbi karon nga i inspirasyon ni Edgardo kinsa nangandoy nga mapahuman niya og paeskwela sa kolihiyo. Taas pa ang panahon nga iyang igahin alang sa maong pangandoy.

Mao nga karon palang bisan unsa nga diskarte ang iyang gihimo masustinihan lang ang panginahanglan sa bata. Labot sa drill og sa actual nga panghitabo kong moabot man kini, nakahunahuna siya nga himoong hands free ang paghatag og protection sa ulo kong dunay linog o sunog nga mahitabo.

Ang hard hat nga iyang gipalit niadtong Sabado taas kaayo og padulngan. Hagit ni alang sa DepEd paghimo og pagtoon kong nasayod ba o wala si Edgardo sa iyang diskarte.

Ang taga Disaster Risk Reduction and Management Council unta nakakita og positibong panag-ingnan niining gihimo ni Edgardo.

Sa mga ginikanan ayaw mo pagsalig anang pandong pandong og libro ug notebook kong dunay linog o sunog nga mahitabo. Mas maayong sundon ninyo ang gihimo ni Edgardo.

Nakaagi na ta og grabing linog niadtong 2013. Angay lang nga log-in nga pagpangandam ang atong pasiugdahan. Pasalamat gani ta nga naatol nga holiday sa diha nga naglinog.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph