SA MGA buwangan, ang mosulod mobayad og entrance fee. Pero kon magdala kag manok nga igtatari, libre ka. Dihay nisulod nga nagdala’g himungaan. Matod pas nagbantay, “Bayad ka kay baye man na.” Tubag sa tawo, “Baye lagi, pero motan-aw man ni sa away sa iyang anak.” Morag si Mommy D nga motan-aw sa fight ni Pacman.
Daghan ang mahilig sa sabong. Ang uban hilantan kon di makaadto sa buwangan inig ka Dominggo. Tingali mingawon sa ilang mga classmate. Di mahuman ang estorya basta bahin na sa manok ug sabong.
Ang di nako kalimtan mao kadtong sabong nga giingong wa magdaog. Ang gamay kaayong manok nga bantam gikontrahan og dako kaayong manok. Pagkinupugay sa duha nawagtang ang bantam. Apan sa pagtuktogaok sa dakong manok, nibawos man sab ang bantam. Sus, nalamoy diay sa kontra.
***
Alang sa akong higala nga si Lapu-Lapu City Councilor Rico Amores, usa ka cockfighting enthusiast, ang sabung di sugal apan usa ka matang sa sport. Pero lahi kini sa naandan nga paugnat sa kusog kay ang mga manok igtatari man ang magtigi sud sa ruydahan.
Mao kini ang esena sa buwangan. Sa dayon nang buhian ang manok, hilabihan ka saba sa mga masyador. Inig buhi na sa duha ka mga manok, mosamot ang kasaba, manglupad ang mga balhibo sa magtigi nga mga manok ug kon mapatay na ang usa, mokalit lang og kahilom ang mga tawo.
Ang di makaadto sa buwangan adto sa tigbakayan. Ang mga makadaog magsigig estorya giunsa paglabok sa ilang manok. Ang mga pildiro huyhoy ang abaga ug hilom kaayo inig uli na sa ilang balay.
***
Niadtong miaging Lunes, Agusto 5, gironda sa kapulisan ang D & C Coliseum, usa ka legal nga buwangan sa Estancia-Ibabao, Mandaue City. Niabot sa 372 ka mga tawo sud sa maong buwangan ang gipangsikop. Nadetinir og tulo ka adlaw apan nakagawas na.
Gilalisan pa karon kon unsa ang balaod nga angay tumanon. Adunay Presidential Decree 449, ang Cockfighting Law nga nag-ingon nga gitugotan ang buwang sa adlaw nga Dominggo lang ug sa mga holiday o pista opisyal. Dunay mga adlaw nga gidili ang buwang.