SUPERBALITA CAGAYAN DE ORO

Lovely Joy, the little warrior

(Pinaambit nga hulagway)

MALIPAYON ug mapahiyumon nga klase sa pagkabata si Lovely Joy Tingcang, 13, taga Lugait, Misamis Oriental bisan pa man sa iyang kahimtang.

Na-diagnose nga adunay bone cancer si Lovely Joy sa nag-edad pa kini og 11 anyos.

Usa si Lovely sa mga bata nga anaa sa Leupapo Inc. o Leukemia Patient and Parents Organization kinsa ang founder mao si Reczel Clarabal.

Nakaila niini ang ginikanan ni Lovely Joy dihang anaa sa ospital ug gitagaan na lamang og usa ka semana ang kinabuhi niini hinungdan nga giingong nangayo kini og numero ni Clarabal gikan sa mga ginikanan usab nga natabangan na niini kaniadto.

Gibutyag ni Clarabal nga sa center si Lovely Joy ang dunay pinaka-kritikal nga sitwasiyon ug nagkinahanglan kini og pagtagad. Bisan pa man sa iyang kahimtang, malipayon kini ilabi na nga diha sa center anaa iyang mga kauban.

"Si Lovely, lively kaayo nga bata, more responsive sa mga joke, lima na siya ka bulan naa pa siya nagpabilin sa amoa, kaluoy sa Ginoo," matud ni Clarabal.

Samtang gibutyag sa inahan niini nga si Bebe nga positibo kaayo ang panglantaw ni Lovely bisan paman sa iyang kahimtang. Giingong nagsugod kini sa dihang kalit nga dunay nitubo nga hubag sa iyang bagtak ug giingong cancer.

“Okay man siya, kay kana ganing pagkaputol ana di man gani mi unta mosugot ipaputol iyang tiil siya man niingon nga ‘ma ipaputol lang nato ni ma para magkita pa ta,’” matud ni Bebe.

Naputol ang usa ka tiil ni Lovely niadtong tuig 2017 samtang ning bag-ohay lang tuig 2019 ang iyang tuo nga tiil.

Si Lovely usab malipayon diha sa center gumikan kay duna kini mga kauban ug makadula ug naa usab kini siya’y kalingawan.

“Nalipay kay naa man koy dulaan, sa balay maghilak ko kay wala man koy kadula,” matud ni Lovely.

Nagpasalamat usab kini ni Clarabal nga maoy nitabang kanila nga dunay makapuy-an dinhi sa siyudad ug sa iyang inahan nga kanunay gauban kaniya.

Samtang wish lamang niini nga makabaton og dulaan.

Leupapo Inc.

ANG Leupapo Inc. o Leukemia Patients and Parents Organization alang sa mga adunay sakit nga Leukemia.

Apan tungod na usab kay daghan ang nagkinahanglan og tabang gitabangan usab niini ang bisan unsa nga sakit nga cancer sama ni Lovely nga adunay bone cancer.

Natukod ang maong organisasiyon sa pagpaningkamot usab ni Clarabal sa dihang nasinatian ang kalisud ilabi na sa pagpangita og modonar og dugo nga gikinahanglan sa ilang mga pasyente ilabi na sa iyang anak nga dunay leukemia.

Nasinatian mismo ni Clarabal ang kalisud sa dihang ang anak ang gipa-ilalom sa chemotherapy tungod sa sakit nga leukemia tuig 2015 ug nasaksihan ang kalisdanan sa ubang mga ginikanan nga nagpailalom usab og chemotherapy ilabi na sa mga walay madangpan hinungdan nga nakahunahuna kini nga i-organisa ug maghimo og organisasyon aron nga legal sila nga makapangayo og tabang ilabi na mga magdonar og dugo.

Natukod kini mismo sa adlaw nga natawhan sa anak niadtong Setyembre 27, 2016 ug gani gipangayo niini sa Ginoo nga unta hatagan og higayon ang iyang anak nga magpakabuhi pa sa taas nga panahon human usab nibutyag ang doktor nga bisan unsa nga oras pwede na nga mawala sa kalibutan ang anak.

Giisip ni Clarabal nga dakong milagro ang nahitabo ilabi na nga iyang gihangyo sa Ginoo ug gisaad nga ipadayon ang pagtabang tungod na usab ang iyang anak hangtod karon nagpabilin pa sa iyang kiliran ug gani arang-arang na ang kahimtang niini sa panglawas.

Gipahimangnuan niini ang mga ginikanan nga dili mawad-an sa paglaum ug isalig ang tanan sa Ginoo ug ihatag ang kalipay sa mga anak nga naghambin og balatian diin maoy usa sa dakong tabang ug makaayo kanila.

"Salig lang, kun atong ubanan sa pagtuo, pagsalig ug gugma ug giya sa atong Labaw nga Makagagahom, kun ipadapat lang bitaw nato sa matag usa walay rason nga dili ta tabangan sa atong Labaw nga Makagagahom,” matud ni Clarabal.

Usa sa mga adunay malumong kasing-kasing ang nitabang sa maong organisasyon ilabi na sa ilang gihangyo nga makadonar og dugo ang Regional Training director sa kapulisan nga si Police Lieutenant Colonel Edison Revita kinsa bisan pa man nga bag-ohay pa lang niini nakaila wala kini nagdumili sa pagtabang ilabi na sa dihang nakita ang kahimtang sa mga bata.

Gibutyag ni Clarabal nga dako kaayo ang iyang pasalamat sa mga adunay malumong kasing-kasing nga nisuporta kanila bisan pa man sa mga ginagmay nga butang sa mga kabataan ug ilabi na sa dakong tabang ni Revita diin nagtugot kaniya sa pagdeliver og nilung-ag nga saging, kamote ug uban pa nga maoy makuhaan nila sa pang-adlaw adlaw nga panginahanglanon.

“Siya gyud naka-open sa ako niingon siya ‘tuturoan kita kung paano manghuli ng isda hindi yung ako ang magbibigay sayo ng isda’, so gitagaan mi niya og livelihood program, gadisplay mi sa ilang canteen,” matud ni Clarabal.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph