DILI seguro unang higayon nga nahimong isolated ang isla sa Olango ug ubang isla sa Kabisay-an tungod sa bagyo o gale warning, sama sa nahitabong unom ka adlaw nga pag-isolate sa maong isla tungod sa pagsuspenso sa gagmayng sakyanan sa kadagatan.
Nahitabo ang hamubong krisis sa pagkaon ug enerhiya tungod sa hinay nga pagsubay sa tabangunong sitwasyon busa way dinaliang tubag sa emerhensiya sa lokal nga kagamhanan.
Nakasabot kita kang Lapu-Lapu City Mayor Junard ‘Ahong’ Chan nga bag-o pa nilingkod sa pwesto. Daghang problema ug kalihokan nga giatubang. Apan asa na ang gipangkuha o gi-import nga banggiitang nga opisyal nga moabag kaniya? Nganga?
Nakakomplikado alang sa dinaliang pagtubag sa alarma mao ang kadugay sa pagtubang sa ubang ahensiya. Lunes, Agusto 5, nigawas na ang taho nga si Chan nangayo og tabang sa Naval Forces Central nga may station pa sa dakbayan, apan Biyernes, Agusto 9, na hingpit nitubag? Panahon nga nitubag na sab ang ubang ahensiya sa kagamhanan sama sa Coast Guard.
Samtang, ang mga molupyo sa Olango ug ubang mga isla segurado nga nakaagi na og pagbansay sa emerhensiya, tahas kini sa Office of the Civil Defence (OCD). Usahay, ang dagkong mga kompaniya nagpasiugda usab sa ilang corporate social responsibility nga nagtudlo bahin sa emerhensiya.
Milutaw sa ulahing hitabo sa Olango timailhan nga wala gihapon makaamgo sa leksiyon o kaha nawala sa hunahuna sa katawhan ug lokal nga opisyal human taudtaod nga way nahitabong katalagman?
Ug usa usab kadto nga mahimong sukdanan ni Chan sa paglili sa katakos sa mga tawo nga nagpalibot kaniya labi na kadtong nanunga na lang sa pagdaug niya.
Leksiyon natong tanan. Basta lihok sa kinaiyahan wa kitay dag-anan, gawas sa pagpangandam. Kaminosan ang epekto sa kinabuhi ug kabtangan.