9 patay sa dengue sa Cagayan de Oro

NITALA na ngadto sa siyam ang namatay tungod sa dengue sa Siyudad sa Cagayan de Oro sugod sa bulan sa Enero ngadto sa Agusto 2, 2019 tuiga diin ang daghan og nakabsan sa kinabuhi naggikan sa Barangay Cugman.

Kini gikan sa 1,655 ka mga kaso sa dengue nga natala dinhi sa siyudad diin niadtong Hulyo 31 dunay namatay sa Barangay Dansolihon ug Puntod.

Gibutyag ni Dr. Fe Bongcas, city health officer, nga nisaka ang ihap sa kaso sa dengue karong tuiga.

“From January to August 2, 1,655 cases out of that, nine ang mortality ana,” matud ni Bongcas.

Samtang ang top 10 nga labing daghang kaso sa dengue sa Agusto 2 nag-una ang Barangay Carmen gisundan sa Kauswagan, Balulang, Canitoan, Gusa, Lumbia, Patag, Iponan, Lapasan, Cugman ug Bugo.

“Kani sila nga gi-focus gyud sa among mga inspectors pero it's not only nga kaning ni-a no kay naa man cases pud sa uban, kani kay tungod kay daghan kaayo silag cases, dinhi pud nga area naay patay mao gyud ni siya gi-advocate namo nga ang barangay mag una una gyud,” dugang niini.

Nasayran nga sa Northern Mindanao anaa sa 60 na ang natalang namatay.

Task force

Tungod niini gimugna na sa lokal nga kagamhanan sa siyudad ang Task Force batok sa dengue nga gilangkuban sa Office of the Committee Affairs, Presidente sa Liga ng mga Barangay, Department of Education (DepEd), Department of Interior and Local Government (DILG), City Local Environment and Natural Resources Office (Clenro), City Information Officer (CIO) ug City Disaster Risk Reduction Management Office (CDRRMO) nga gipangulohan sa City Health Office.

Gibutyag ni Bongcas nga tumong niini nga mahunong na o mapugngan ang grabe nga pagsaka sa ihap sa dengue sa nagkadaiyang dapit sa siyudad ug ang task force ang motutok niini.

Gidugang pa nga kini dili lang usab sa dengue apan lakip na usab sa bisan unsa nga kalamidad nga atubangon ang i-apil sa pagplano sama sa baha, linog ug uban pa.

“Hopefully nga kini nga task force nga atong nahimo this would be a working task force ang function gyud ani to oversee tanan, whole Cagayan de Oro mag-identify mi sa among responsibilities,” matud ni Bongcas.

Gidugang pa nga magporma na ang task force og incident command system ug tan-awon ang komposisyon sa task force nga kinahanglan representahan mismo sa pangulo sa usa ka buhatan.

Samtang nibutyag usab si Dr. Ramon Nery nga importante kaayo ang gimugna nga task force tungod kay bulan pa lang sa Agosto ug mas motaas pa ang kaso sa dengue sa mga mosunod nga bulan.

Gidugang pa nga kun dili maghimo og “extraordinary intervention” mas motaas pa kini tungod kay mao na kini ang sumbanan ug makita usab nga mas taas karon ang ihap sa kaso sa dengue kumpara sa nilabay nga mga tuig.

Nagpahimangno ang mga kadagkuan sa Department of Health ug sa City Health nga kinahanglan nga batasanon ang pagpanglimpyo o ang 4-o'clock habit lakip na usab ang pagsul-ob og longsleeves, pajama ug paggamit ug moskitero ug mga insect repellent nga lotion.