SAKOP sa usa ka fraternity ang gitabangan og kulata ug gidunggab-patay sa mga miyembro sa kaatbang nga fraternity niadtong Sabado sa kaadlawon, Agusto 10, sa Barangay Poblacion, lungsod sa Compostela.
Nadakpan hinuon dayon ang suspek sa gilusad nga manhunt ug follow-up operation sa kapulisan sa Compostela nianang pagka ala una sa hapon sa susamang adlaw.
Ang biktima giila nga si Lenie Ochea Noval, hingkod, taga barangay Basak, lungsod sa Compostela nga nakaangkon og dinunggaban sa lawas.
Matod ni Police Captain Ian Macatangay, hepe sa Compostela police station, nga gikan nangaon sa usa ka barbecuehan ang biktima uban sa iyang higala ala 1:30 sa kaadlawon niadtong sabado.
Sa dihang mo pauli na unta kini sakay sa iyang motor kalit lang nangabot ang grupo sa mga lalake ug gibabagan ang biktima sa gibanabana napulo ka mga tawo.
Gitabangan dayon pag kulata dihadiha dayon ang biktima nga si Noval apan nakahigayon pa siya sa pagdagan apan gigukod na usab kini hangtod nga nadagma.
Usa sa mga suspek nga giila nga si Joshua Canlas, hingkod, taga barangay Poblacion Compostela ang mikuha sa iyang kutsilyo ug dayong dunggab niini sa dughan.
Dali nga misibat ang mga suspek samtang ang biktima gisakay dayon sa ambulansya sa lungsod ug gidala sa Danao City District Hospital apan gi deklarar nga dead-on-arrival.
Matod ni Macatangay nga human mailhi ang suspek ila dayon nga gilusad ang follow up ug manhunt operation.
Nakadawat silag impormasyon nga misibat kini paingun sa siyudad sa Sugbo ug naa sa Barangay Inayawan.
Tuod man mga alas 2:42 nianang pagka Sabado sa hapon nasikop nila si Canlas, 27, taga Poblacion Compostela.
“Ang motive ani kay frat rivalry kay kining victim sakop sa Akrho nya kining suspek Crips, mao lagi to pagka kaadlawon nahitabo ang pag dunggab nya misibat mao to atong gi hot pursuit atong nadakpan dayon ang suspek,” matod ni Macatangay.
Nagpadayon ang pagpanguhag kasayuran ang Compostela sa mga saksi kung kinsa pa ang mga kauban sa suspek nga maoy nagtabang sa pagkulata sa biktima.
Adunay tulo ka mga saksi ang kapulisan nga mag tudlo kang Canlas nga mao gyud ang midunggab niini tumong sa dughan. (AYB)