NAKAPLAGAN sa Sandiganbayan nga sad-an si kanhi Daanbantayan mayor Maria Luisa Loot ug kanhi konsehal sa lungsod sa kurapsyon ug malversation of public funds labot sa P500,000 nga pautang sa negosyo sa pagpamuhi og buntog.
Ang Sandiganbayan 7th Division nipakanaug og silot nga pagkapriso ug perpetual disqualification sa pagtrabaho sa gobiyerno batok nila ni Loot ug Samuel Punay Moralde.
Ang Superbalita Cebu ug SunStar Cebu nitawag ug ni-text ni Daanbantayan Mayor Sun Shimura, anak ni Loot, aron makuhaan og habig ang inahan, apan sa pagsuwat ning balita, wa pa kini motubag ug reply sa text.
Ang hukom sa Sandiganbayan gipakanaug niadtong Agusto 2, 2019, sobra sa duha ka tuig human ang Office of the Ombudsman nipasaka og mga kaso batok nila ni Loot ug Moralde sa Marso 2017. Ang hukom mahimong maapelar.
Ang P500,000 gipautang sa kagamhanan sa Daanbantayan ngadto sa RBA Quail Raisers Association niadtong Pebrero 28, 2007, diin si Moralde maoy chairman ug si Loot pa ang mayor kun duha ka buwan sa dili pa ang 2007 elections.
Apan hangtod karon, wa kini mabayri.
Gimandoan sa Sandiganbayan si Loot ug Moralde nga tingbon og bayad ang P500,000 sa Daanbantayan.
Ang indemnification dunay interest rate nga sayis porsyento matag tuig hangtod nga hingpit mabayran ang kantidad.
Gumikan sa paglapas sa Anti-Graft and Corrupt Practices Act, sila gihukman mabilanggo og unom ka tuig ug usa ka buwan hangtod sa walo ka tuig.
Ubos sa sala sa malversation of public funds, sila gisentensiyahan og di mominos sa duha ka tuig upat ka buwan ug usa ka adlaw nga prision correccional hangtod sa pito ka tuig upat ka buwan ug usa ka adlaw nga prison mayor.
Base sa mga dokumento sa Sandiganbayan, si Loot nisud og memorandum of agreement uban sa RBA alang sa utang nga P500,000 niadtong Pebrero 28, 2007.
Apan nasayran sa Sandiganbayan nga ang MOA depektuso ug dili balido tungod kay dihang si Loot ug Moralde nipirma niini, ang RBA dili accredited isip non-government organization o people’s organization (NGO/PO).
Bisan og ang konseho sa lungsod nipasar og resolusyon nga nagtugot ni Loot nga mosud sa MOA tali sa RBA alang sa P500,000 nga loan, dili gihapon kini mahimo nga makadawat og ayuda sa lungsod sanglit dili kini accredited nga NGO/PO. (MPS, SCG)