ANAK sa City Administrator sa siyudad sa Tagbilaran Bohol ang nasikop sa gilusad nga joint buy bust operation sa National Bureau of Investigation Bohol ug Philippine Drug Enforcement Unit Bohol sulod sa usa ka hotel alas 9 gahapon sa buntag Agusto 11.
Ang dinakpan giila nga si Eric John Borja 26, nga nag puyo ra usab sa usa sa mga barangay sa siyudad sa Tagbilaran.
Matod ni Atty Rennan Oliva, ang head sa NBI-Bohol, nga ilang napalitan og duha ka tablitas sa ecstasy ang suspek.
Dugang ni Oliva nga duha ka buwan nila nga gipanid-an si Borja human makakuhag impormasyon labot sa ilegal nga kalihukan niini.
Giingong lisud dakpon ang suspek tungod kay dili kini mohatag sa bisan kinsa lang nga mopalit.
Iyang mga higala ug mga barkada nga susama niyag pangidaron ang kasagaran niya nga customer.
Atol sa buy bust gitunol ni Borja ang duha ka tabletas nga mobalor sa P1,500 ang matag usa ka tablitas sa ecstasy.
Lakip sa nakuha ang laing lima pa ka tabletas nga wala pa mahalin sulod sa iyang lawak nga giabangang hotel.
Sa pag hiling sa cellular phone ni Borja nasuta sa NBI ug PDEA nga gikan sa siyudad sa Sugbo ang iyang supply sa ecstasy nga mao usab ang ilang gipaubos sa imbestigasyon.
Gihimakak hinuon sa suspek nga namaligya siyag ilegal nga drugas og ang ecstasy nga nakuha gikan kaniya iya ra matod pa kining kunsomo.
Nakurat usab matod pa ang amahan nga maoy City Administrator sa Tagbilaran sa pagka sikop sa iyang anak sanglit wala siya masayod nga nalambigit kini sa ilegal nga drugas. (AYB)