DILI mominos 94 ka mga drayber o tag-iya og sakyanan ang ang naisyuhan og temporary operator’s permit (TOP) atol sa one time big time operation sa Land Transportation (LTO) 7 sa N. Bacalso Avenue sa mga dakbayan sa Sugbo ug Talisay nga bahin sa dan niadtong Biyernes, Agusto 9.
Nasayran nga ang N. Bacalso Ave dunay gitas-on nga 232 kilometros gikan sa lungsod sa Santander paingon ngadto sa dakbayan sa Bogo ug prayoridad kini sa LTO 7 nga limpiyohan.
Ang mga personnel sa LTO 7 inabagan sa Highway Patrol Group nisubay sa naasoy nga dalan ug ilang naisyuhan ang 94 og TOP ang 94 ka mga drayber diin sagad kanila mga motorsiklo.
Si Regional Director Victor Caindec sa LTO 7 nagkanayon nga gisakmit nila ang mga driver’s license ug giisyuhan og violation nga “reckless driving” ubos sa Article 5, Section 48 sa Republic Act 4136 kun Land Transportation and Traffic Code.
“No person shall operate a motor vehicle on any highway recklessly or without reasonable caution considering the width, traffic, grades, crossing, curvatures, visibility and other conditions of the highway and the conditions of the atmosphere and weather, or so as to endanger the property or the safety or rights of any person or so as to cause excessive or unreasonable damage to the highway,” tipik sa provision sa balaod nga gikutlo ni Caindec atol sa Kapihan sa LTO 7.
Gipadayag niya nga dili obstruction ang ilang giisyu sa TOP apan reckless driving.
Kon dunay mokuwestiyon niini, mahimo silang modangop sa korte aron mahatagan og katin-awan.
Mitumaw kini nga hagit ni Caindec human sa pipila ka reklamo nga nalakip sa reckless driving bisan gipara lang ang ilang sakyanan daplin sa dan, wala kini magdagan.
Ang operasyon sa LTO 7 maoy pasiuna nilang tubag sa panawagan ni Presidente Rodrigo Duterte ug sa Department of Interior and Local Government (DILG) nga hawanan ang tanang national highway gikan sa tanang matang sa obstruction.
Dugang ni Caindec nga kon aduna na silay makuha nga towing services, magsugod na sila og pangguroy sa mga sakyanan nga gi-parking sa mga national highway sa mga siyudad sa Sugbo, Mandaue, Talisay, ug Lapu-Lapun ug ubang local government units. (B)