NAKABASA mo sa akong interview nilang Dennis Trillo ug Jerald Napoles ug sa Cebuano director nga si Kerwin Go nga nigawas dinhi sa Laysho niadtong Sabado?
Wa mo kabasa? Ngano man? Haha. Bitaw, kuyawa sad ato ilang salidang “Mina-Anud” uy. Kay nag-special screening man sila sa SM Seaside.
Di ka kuyawan nga sige ra silag simhot og suyop. Duna pa gyuy masturbation scene si Napoles ug pumping scene si Dionne Monsanto ug Dennis. Unya ang ending? Huh...
Ako pa gyuy gi-tripan sa taga-Regal Films kay ako’y ilang gipa-estorya para kuno sa ilang VTR aron i-recommend ang pelikula kay nindot kuno ko modag pangutana. Ha? Ako jud!
In fairness, nindot ang Mina-Anud. Ako motuo ko nga mao gyud to siyay realidad. Showing na ni sa Aug. 21 sa mga sinehan. Go na!
Bidaman
Wa pa gani semana gikan nidaug si Yamyam Gucong sa Pinoy Big Brother, lain na sad Bisaya ang nikulit og pangan sa Manila niadtong Sabado.
Ang 24-anyos nga Cebuanong si Jindric “Jin” Macapagal ang giproklamar nga unang ultimate Bidaman grand winner sa It’s Showtime.
Si Jindric nahimo sad ni siyang finalist sa “2016 Pinoy Boyband Superstar.”
Ang Cebuano nga si Mario Colmenares diay ang nag-co manage karon ni Jindric nga mao say manager sa Kapamilya actor Tony Labrusca.
Pirme mi mag-estorya aning Mario sa una kay daghan ni siyang gihuptang talent. Ig-agaw ni sila ni Angel Locsin ug suod kaayo ni sila.
Dako’g chance mosikat ni si Jinric kay maayo mosayaw ug naa niya ang tanang alas karon sa showbiz aron magmalampuson. BidaMan!
Mountain Hills
Atangi ang atong promo sa 25th anniversary promo dinhi sa Laysho kay magsugod na ta sa di madugay. Mag-25 years na ang Superbalita sa Oct. 23. So silver anniversary. Unsa kahay nindot nga hashtag ani? Naggilak-gilak sa ika-25 o naghilak-hilak kay tiguwang na si AC! Haha...
Akong dakong mga pasalamat sa Mountain Hills Paradise Resort (operated by Amalia Property Ventures Corp.) sa Buluang, Compostela nga maoy atong sponsor sa anniversary promo. Matsalam Sir!
Basabasa lang unya mo dinhi mga suki sa dugang pang mga kasikas ug kalambuan sa atong Tagming, ming, ming, ming...