KAPIN sa dos mil ka mga tawo ang nanambong sa dinaliang imbitasyon sa grupo nilang Tisha Zozobrado ug Zan Cabrera sa usa ka religious meet and greet diin nagwali dinhi sa Syudad sa Sugbo kini si Senador Manny Pacquaio.
Naapil ko sa grupo kay giimbitar sab ang Political Officers League of the Philippines (POLPHIL) ug ang Cebu City chapter sa Kilusang Pagbabago (KP).
Nitambong sab si Cebu City Mayor Edgardo Labella sa maong kalihokan nga gipahigayon sa Grand Ballroom sa Cebu Waterfront Hotel diha sa Lahug.
Alang kanako, daw pastor na gyud si Pacquiao. Niingon ko og daw kay nakahibalo na man kita nga siya usa ka boksidor ug senador. Nasuweto na sab kita sa iyang istorya nga rags to riches.
Apan lahi ang aura sa senador diha naghisgot siya kabahin sa iyang kinabuhi ug sa iyang kasuweto na karon kabahin sa bibliya.
Kay naminaw man ko sa tibuok niyang wali, mabati nimo ang iyang kamatinud-anon sa iyang pagtuo labi na dihang iyang gipanaminan mismo ang iyang kinabuhi.
Kon naka-connect man ang senador sa mga naminaw kaniya, ug siguro ko mao kana ang nahitabo basi sa pagresponde sa mga naminaw, di lang sa alimpatakan gidawat ang iyang mensahe. Nideretso siya sa kasingkasing.
Kadtong nanambong sa Waterfront kay di mga sakop sa iyang religious group. Lahi sab kadto nga audience nga dali kaayong napundok. Lalim bay ang core group sa nag-organize sa miaging semana lang naabot sa Sugbo.
Ug nasiguro ko ang iyang mensahe molanog pa sa mga kaugalingong mga network sa dos mil nga nanambong.
Bisan pa man, isip sakop sa media ug interesado sab sa politika, di nako malimod nga maghunahuna sa epekto sa politika sa maong nahitabo.
Kadako diay sa potential mass base ni Sen. Manny Pacquiao gawas sa iyang mga boxing fans. Kana kon interesado siya modagan og mas taas nga katungdanan karong 2022. Hmmm.
Sa pagkakaron hinuon, nilihay ang senador dihang gipangutana sa mga sakop sa media nga nag-atang kaniya mogawas sa venue aron ma-ambush interview.
Matod pa, daghan kaayong mga buluhaton isip senador kay sa nianang maghunahuna na kabahin sa 2022.
Totol
Sa miagi natong lindog, naghisgot kita kabahin ni Totol Batuhan nga maayo unta nga kongresista kon ato pang gihatagan sa higayon pipila ka piliay nga milabay.
Bisan pag naghisgot ko nga posibleng di na siya modagan pa, duna dayoy nitimang nga di na daw angayan siyang pugson. Dunay lain nga gustong modagan nga maglisud na kon si Totol iyang kaatbang? (@anol_cebu sa Twitter)