GAHI? Sa akong pagsusi sa uban nga mga distrito sa kongresista dinhi sa Sugbo, ang dakbayan sa Lapu-Lapu ra ang naghatag og opisina sa ilang kongresista nga naa nahimutang sud sa city hall. Di ni ikahibung tungod kay ang miagi nga pamunoan sa dakbayan gidumala ra sa pamilya Radaza. Si kanhi mayor Paz Radaza, nga karon kongresista maoy mipuli sa iyang anak nga si Aileen.
Natural lang nga hatagan ni kanhi mayor Paz Radaza ang iyang anak nga si kanhi kongresista Aileen og luna sa city hall alang sa opisina sa kongresista aron makadaginot ug duol pa sa opisina sa mayor. Ang Lapu-Lapu City nahimo na nga usa ka congressional district tungod ni kanhi kongresista Nerissa Soon-Ruiz nga nagpasar og balaodnon aron mahimo nga lone congressional district ang dakbayan, nga sakop kaniadto sa siksto distrito.
Apan nausab ang kamada sa Dakbayan sa Lapu-Lapu kay sa miaging piliay napildi man ni Mayor Ahong Chan si kanhi mayor Boy Radaza, nga maoy midagan agi’g puli ni karon Kongresista Paz.
Tungod kay si Mayor Chan ug Kongresista Paz di man kauban sa partido-pulitika mao nga di nato ikahibung nga sa paglingkod pa lang ni Mayor Chan iya dayon gipasirad-an ang opisina sa kongresista nga naa nahimutang sud sa city hall ug silingan sa opisina sa mayor.
Apan si Kongresista Paz nakigbisog sa orden ni Mayor Chan ug mipasaka og petisyon sa korte arong maablihan ang iyang opisina ug mapugngan si Mayor Chan. Nagpadayon pa sa korte ang petisyon ni kanhi Mayor Paz nga karon kongresista na. Si Mayor Chan wa sad matulog sa isyu kay nangayo siya og opinyon ni DILG Secretary Eduardo Año.
Human madawat ni Mayor Chan ang opinyon ni DILG Secretary Año, nga sayop ang ordinansa nga naghatag og opisina sa kongresista sud sa city hall, nagpadala dayon og suwat si Mayor Chan ngadto ni Kongresista Paz niadtong Agosto 9, nga nagmando sa kongresista nga mopahawa na siya sumala sa opinyon sa DILG.
Si Kongresista Paz nagdumili ug nagmagahi gihapon og pahawa sa iyang opisina, nga iya sa city hall, kay matud pa ang isyu naa na sa korte ug ang opinyon ni Secretary Año wala man nagmando kaniya sa pagpahawa sa iyang opisina. Ang gibasihan ni Kongresista Paz sa paggamit sa luna na sa city hall sa iyang opisina mao ang ordinansa nga gipasar sa konseho sa wa pa ang piliay niadtong Mayo 13 nga naghatag katungod sa kongresista.
Di ni paglaban ni Mayor Chan, apan kon ako si Kongresista Paz mopahawa na lang siya kay sa maggahi nga mora og iya pa ang city hall. Unya, mogawas na hinuon atubangan sa katawhan ug sa atong balaod nga siya ang dautan. Nganong magdaginot man si Kongresista Paz nga naa man unta budget ang kongreso alang sa abangan sa opisina sa distrito?
Hinumdumi, Kongresista Paz, nga sa panahon ni Mandaue City Mayor Jonas Cortes, nga siya pa ang kongresista sa siksto distrito, wa siya mag-opisina sa city hall kay duna man district office ang kongresista sama sa panahon ni kanhi mayor kongresista Luigi Quisumbing. Di ba klaro man nga way obligasyon ang city hall, nga mohatag sa kongresista og libre nga opisina?