MORA gyud og naibtan sa tunok ang mga biyahidor, driver ug motorista niadtong Dominggo sa dihang giablihan na ang mga dagkong dalan nga giagi-an sa 2019 Regent Aguila Ironman 70.3.
Grabi gyud ang kahuot sa trapiko nga nasinati sa mga siyudad nga naapektohan sa maong international competition nga mitadlas sa mga dakbayan sa Lapu-lapu, Mandaue, Cebu City ug Talisay.
Gikan nianang pagka alas tres sa kadlawon hangtod na sa alas 12 sa udto gipangsirhan na ang habig sa Cebu South Coastal Road (CSCR) sa Talisay, South Road Properties (SRP)sa Cebu City, North Reclamation Area ug pipila ka mga major road sa Mandaue, dayon na didto sa Lapu-lapu City.
Kay lagi international events man, dako kini og ikatabang sa international exposure sa Sugbo, ilabi na gyud sa Lapulapu kay mao may sentro sa kalihukan.
Pero kon atong hisgutan ang lokal nga ekonomiya, ambot og unsaon na pag-justify sa organizer kinsa, sa sayo pa, nanghambog nga dako kini og natabang sa Sugbo kon pinansiyal na ang hisgutan.
Kini tungod sa presensiya sa daghang mga langyaw ug mga local nga mga participants ug supporters kay mokita lagi kuno ang siyudad kay mogasto ug mamalit man sab ni sila.
Pero unsa man sab kadako ang kadaot nga nahimo niini ngadto sa mga local nga negusyante tungod sa ilang pagkalangay ug pagkabara sa trapiko.
Sa laktod nga pagkasulti, naapektohan ang ilang negusyo kay nadelatar man sila sa paghiabot sa ilang destinasyon.
Laing punto nga gusto natong ipaabot, unsa may nakuha niini sa dakbayan sa Mandaue, Cebu City ug sa Talisay nga ang mga participants ug bisita atoa ra man han-ok sa Shangri-La ug ubang mga hotel sa Lapulapu.
Sa laktod nga pagkasulti, ang Lapulapu ray nakabenepisyo sa maong event, pero nakahasol sa laing tulo ka dakbayan. Daghan ang nagbagotbut niini.
Unsa man say gikatabang sa organizer (Sunrise Events, Inc.) ngadto sa Cebu City, Talisay ug Mandaue? Nagbayad ba sila o duna ba silay gikatugbang sa paggamit sa dalan?
Kadako nila og kita unya dili motan-aw og unsay ilang matabang sa mga siyudad nga ilang gipahimuslan.
Niadtong Agusto 2, si Cebu Governor Gwen Garcia mihulga nga posibling kadto maoy katapusan nga pag-host sa Cebu sa Ironman human sa walo ka tuig.
“This is the last time. I think it’s time for Ironman to give back to Cebu, which has been hosting this challenge for eight years to the great economic benefit of this Ironman challenge,” matod ni Garcia sa usa ka press conference. “What can you give back in return, considering that you’ve been reaping huge profits?”
Exactly, the governor is right. Sports tourism yes, pero mora man sab og nagpahimulos lang ang organizer alang sa ilang kaugalingong interest. Giulo-ulohan lang ang local government.
Mas maayo siguro og didto na lang sa Lapu-lapu ang tanang rota niini kay, sa gikaingon ko na sa unahan, nga way nakuha ang tulo ka dakbayan ning maong event. (jun.migallen22@gmail.com)