NAGPANIKAD ug mipadayag sa iyang kaandam si three-division champion Johnriel Casimero sa iyang umaabot nga away batok ni Cesar Ramirez karong Agusto 24 sa Fil Oil Flying V Arena sa San Juan didto sa Kaulohan.
Depensaan ni Casimero ang iyang interim World Boxing Organization (WBO) bantamweight title.
“Andam na kaayo ko. Lig-on ni si Ramirez ug dili ni nato kompiyansaan,” matod ni Casimero kinsa nangandoy nga iyang mahiusa ang tanang titulo sa bantamweight division.
Gipasumbingay SA 30 nga taga Ormoc City nga iya na karon ang panahon ug gusto niyang pangpukanon ang tanang mga maayo diha sa iyang timbang.
Ang Mexicanong Ramirez adunay 18-3, 11 knockouts, nga baraha ug sa uwahi niyang away, iyang gipukan pinaagi sa unanimous decision si Eddy Valencia.
Ang kadaugan ni Casimero batok ni Ramirez maoy maghatag kaniya og katungod nga makigsangka sa regular WBO champion nga si Zolani Tete isip mandatory challenger.
“Ang ako gyud nga target ning awaya, si Teter. Mao nga nagpreparar ko og maayo,” dugang ni Casimero nga nahinabi ni Edri Aznar sa Sun.Star-Cebu.
Si Tete mi-backout sa World Boxing Super Series (WBSS) tournament bantamweight semifinals diin iya unta nga ikasangka ang Filipino star nga si Nonito Donaire Jr.
Kini human makaangkon og angol atol sa iyang training. Tungod niini, si Casimero nahatagan og kahigayonan nga makaaway alang sa interim title batok ni Ricardo Franco kinsa iyang gi-knockout sa ika-12 ka round niadtong Abril 20, 2019.
Sa kasamtangan, si Casimero kinsa may 27-4, 18 Knockouts, nga record, nag-training ubos ni Nonoy Neri.
Nagsugod ang iyang ensayo didto sa Los Angeles, California sa niaging buwan uban ni Filipino boxing icon Manny Pacquiao.
Nagpadayon ang iyang training karon sa Davao City sa MP Boxing Gym. (EKA, JBM)