NAGKUMBOYA og 52 puntos ang import nga si Tosh Sesay ug Shane Menina sa dihang gilampaso sa UC Webmasters ang CIT-U Wildcats, 108-96, niadtong Dominggo sa 1st Captain Kirk Bryan Repollo/St. Agustine Cup Inter-collegiate Basketball tournament nga gipahigayon sa Inayawan Sports Complex, dakbayan sa Sugbo.
Si Sesay mihagpat og 32 puntos, midugang og 19 si Menina sa maong kadaugan nga naghatag sa Webmasters og lingkuranan alang sa finals.
Ilang ikasangka sa knockout championship match ang modaog tali sa USP-F Panthers ug USJ-R Jaguars nga nagtinaktakay kagabii.
Gidominar sa UC ang fourth quarter pinaagi sa 29-20 nga rally aron pagprotehir sa ilang limpyo nga baraha, 3-0.
Laing naka-double figure sa Webmasters si Tristan Albina nga may 18 puntos.
Nangulo sa Wildcats si Jesse Aloro nga may 18 puntos ug tag 17 usab ang nahatag nila ni Mark Christian Kong ug Malone Ventura alang sa CIT-U ni coach Edzel Vallena. (JBM)