SUGBOANONG babaye nga basketbolista ang nalakip sa lima lang ka mga Pinoy nga napili alang sa 11th Edition sa Basketball Without Borders (BWB) Asia.
Kini maoy gipahibawo sa National Basketball Association (NBA) ug sa International Basketball Fedration (Fiba) sa niaging adlaw.
Si Florence Jil Talas, 17 anyos, kinsa lumad nga taga Barangay Labangon, dakbayan sa Sugbo naapil sa maong international event nga sugdan ugmang adlawa, Agusto 14-17 didto sa Tokyo, Japan.
Ikauban ni Talas ang Fiba 3x3 standout nga si Kristine Cayabyab, anak ni kanhi PBA player Eddie Laure nga si Echo Laure, Jr. NBA All-Star nga si Harold Alarcon ug ang Batang Gilas forward nga si Joshua Rafael.
Moabot ngadto sa 64 ka mga partisipante nga gikan sa 18 ka mga nasod ang napilian alang sa maong kalihukan nga sa ikaduhang higayon adto ipahigayon sa Japan nga mao usab ang mi-host niini niadtong 2012.
“Very proud kaayo mi, Sir sa among anak ug dili mi katoo sa iya naabtan karon. Nagpasalamat ko og dako sa Ginoo, Sir,” matod sa amahan nga si Noel Talas sa dihang gikahinabi sa Superbalita.
Si Talas,kanhi nag-eskuwela sa Abellana National School diin sa samang higayon nahimo usab siya nga basketball player. Katulo siya ka duwa sa Palarong Pambansa ug sa Central Visayas Regional Athletic Association (Cviraa) diin sila kaduha ma-champion.
Kampiyon sila saBatang Pinoy Regional ug nahimo usab nga most valuable player sa Jr. NBA niadtong 2015.
Kini gawas lang sa mga runners-up nga iyang nahipos sa mga nagkadaiyang torneyo nga iyang gisalmotan. Ang talagsaong abilidad nga gipakita ni Talas sulod sa korte, nakaagni og mga coaches sa Kaulohan diin pipila niini ang mitanyag kaniya. Tuod man wa palabya ang panahon ug iyang gidawat ang tanyag sa National University. Sa kasamtangan anaa siya sa Chang Kai Shek school, ang sister-school sa NU, nag-eskuwela.
“Actually, ang NU gyud na siya, unya Grade 11 pa man, so inig college niya, varsity na na siya sa NU Lady Bulldogs,” dugang sa amahan kansang panginabuhi mao ang pagpaninda og sud-an uban sa iyang asawa nga si Jasmin. Gisaysay ni Noel nga nagsugod ang kahilig og basketball sa iyang bugtong anak sa dihang gisigihan kini niya og dala samtang magduwa siya og basketball.
“Nine years old pa lang siya nagsugod og duwa-duwa ug basketball kay sige man kuyog dire nako everytime kung naay koy duwa. Mao nga naganahan na ang bata ug na love na hinoon niya ang bola sa basketball ug dili na ang barbie doll ug movies nga iya permi ipasalida,” matod ni Noel kinsa mitug-an nga si Michael Jordan ug Stephen Curry maoy idolo sa iyang anak.
Si Talas nalakip usab sa training camp ni Dondon Hontiveros ug iyang ka batch usab sa Jr. NBA ang higanting si Kai Sotto ug ang anak ni Dondon nga si Isaiah “Ice” Hontiveros.
Sa kasamtangan, sakop usab siya sa Team Hijas Pilipinas, nga nagrepresentar sa nasod sa mga international competition. Nakaduwa na usab siya sa Malaysia sa niaging tuig ug Indonesia karon lang tuiga.
Sa edad ni Talas karon, siya sayod nga daghan pa ang mga butang ug opurtunidad nga mapaabot sa iyang karera nga maoy nagtukmod kon unsa ug asa siya karon.
Apan taliwala ning tanan, wala kini makapapas sa iyang tinguha alang sa ilang kaugmaon nga mao ang pagtapos sa kursong iyang gidamgo - Business Management.
“Bisan og mingawon mi niya kay bugtong ra lagi, amo lang giantos gyud kay mao may gusto niya. Siyento por siyento gyud siya namong suportaran,” panapos sa amahan. (JBM)