MAKADAWAT og P20,000 nga financial incentive ang mga informant nga makahatag og tinuod nga kasayuran sa mga nalambigit sa online sexual exploitation of children (Osec) sa lungsod sa Cordova.
Kini kon moepekto na ang Ordinance No. 2019-39 nga gipanday ni Konsehal Angeles Gairanod ug gipasar sa konseho sa lungsod niadtong Hunyo 3.
Sa Section 3 sa ordinansa, nag-ingon nga si bisan kinsa nga makahatag og impormasyon nga human sa validation moresulta sa pagkasikop sa mga nalambigit sa Osec, hatagan og P20 mil nga financial incentive.
Nalatid sa Section 4 sa ordinansa nga tanang mga impormasyon apil apan dili limitado sa pangan sa impormante, ang suspek ug pag-ila sa mga biktima kay higpit himuong confidential ug ibutyag lang kon dunay kamandoan sa korte.
Ang mga impormasyon lang nga giduso ngadto sa mayor, chairperson sa committee on children, pangu sa Municipal Social Welfare and Development Office ug hepe sa kapulisan sa lungsod, ang i-validate.
Ang ordinansa napirmahan na ni Mayor Mary Therese Sitoy-Cho. Apan ubos pa kini sa review ug komento sa committee on budget and finance sa Sangguniang Panlalawigan sa Sugbo.
Nasayran, ubay ubay na ang nasikop sa mga awtoridad sa Cordova nga nalambigit sa Osec diin dunay mga ginikanan ang mismo nilawog sa ilang mga anak ngadto sa mga langyaw bugti sa salapi.
Niadtong Mayo 29, 2019, usa ka 23 anyos nga inahan ang niangkon nga sad-an sa sekswal nga pag-abuso og mga bata nga ipakita online ngadto sa iyang mga kustomer bugti sa kwarta.
Siya nahukman mabilanggo sud sa 21 ka tuig human niangkon nga sad-an sa attempted trafficking in persons ug aiding or abetting sa paghimo sa cybercrime.
Siya nasikop sa kapulisan pinangulohan sa mga miyembro sa Anti-Cybercrime Group niadtong Hunyo 23, 2018 sa Cordova diin naluwas ang tulo ka batan-ong mga babaye nga nag-edad og 12, 12 ug 12 niadtong panahona. Laing 4 anyos nga babaye ug duha ka mga anak nga mga lalake sa online trafficker ang giluwas usab sa maong operasyon sa kapulisan. (SCG)