SI KANHI Davao City standout Sonny Wagdos milampurnas sa mga kaatbang, aron makuha ang men’s 25K title sa Kadayawan Run 2019 nga gihimo pagawas ug pabalik sa People’s Park, Dominggo, Agosto 11.
Ang kanhi University of Mindanao (UM) bemedaled varsity trackster, nga kasamtangang anaa sa Philippine Air Force (PAF), mioras og 1:27:23 segundos aron pildihon sila Rizal Memorial Colleges’ Arlan Arbois (1:29:29), Jorge Andrade (1:34:07), Romjohn Maceren (1:52:02) ug Marced Macambong (1:57:15).
“Nakachamba raman ko Maam,” suma sa 24-anyos nga kampeyon nga anaa sa usa ka semanang bakasyon dinhi.
Si Wagdos, nga nahimugso sa Prosperidad sa Agusan del Sur, ugsi Arbois sa Tupi, South Cotabato, ang dikit kaayo sa unang lima ka kilometro.
Tungod mas anad siya sa pagdagan sa 5K ug 10K, ang pakigtigi sa 25K dakong hagit kaniya.
“Medyu sakit jud ang 25K Maam. Tibuok lawas jud ang sakit.”
Mobiyahe sab pabalik sa Manila karong Sabado si Wagdos aron suwayan ang swerte sa Southeast Asian (SEA) Games slot sa qualifying, Septyembre 1 ug 2.
Samtang si Jennylyn Casilagan, miangkon sa 25K women’s crown diin sila Catherine Arias (2:21:31) mihuman sa ikaduha, Jill Bautista (2:43:36) ikatulo, ug Hazel Paspe (2:43:58) sa ikaupat ug Jayben Bodrie (2:45:46) ikalima.
Sa 10K, si Jimboy Lugay nanguna sa men’s division samtang si Daire Mae Daban sa women’s event.
Si Jomarie Luayon ug Margie Cajetarios sab ang nanguna sa men’s and women’s 5K championship.
Mga mananaug, midawat og medalya, freebies sa kompetisyon nga giorganisa sa BBG Run Events ni coach Roel Amabao-Ano.
Gipresenta sab kini sa city government of Davao pinaagi sa Sports Development Division of the City Mayor’s Office.