SUPERBALITA CEBU

Kapulisan, Muslim community magtinabangay

MGA Muslim sa Bgry. Pajac, Siyudad sa Lapu-Lapu nga nisaulog sa Eid al Adha, makigtinabangay sa kapulisan alang sa kalinaw ug kahusay sa Siyudad ug tibuok nasud.

Atol sa kasaulugan sa mga Muslim sa Eid’l Adha sa Lunes, Agusto 12 usa sa ilang giampo ngadto kang Allah mao ang kalinaw ug kahapsay.

Sa ilang pagsaulog, may duha ka mga kanding ug usa ka baka ang ilang giihaw isip halad.

Simbolo usab kini sa gibuhat nga sakripisyo ni Ibrahim sa iyang anak isip pagtuman sa sugo sa Diyos kaniya. Ang mga hayop nga ilang gihalad hinatag sa kapulisan sa PRO 7.

Sukad nga milingkod ang pangu sa Police Regional Office (PRO 7), Police Brigadier General Debold Sinas, nahimo na kini niyang tinuig nga panaad.

Matod ni Regional Community Affairs Development Division 7 (RCADD) Chief, Renato Dugan, nga usa kini sa mga pamaagi sa kapulisan sa pagpalig-on sa relasyon tali sa tibuok Muslim community.

“Of course makita man nato karon nga daghag mga panghitabo nga naay terroristic acts nga dili pod nato ika deny nga dunay mga nag involve nga mga personnel gikan sa Muslim communities. That’s why dako gyud ni nga ikatabang,” pagpasabot ni Dugan.

Dugang pa ni Dugan nga dako ang ikatabang sa maayong pagsinabtanay sa kapulisan ug Muslim community alang sa pagkab-ot sa kalinaw ug kahusay sa palibot ang ilang pagpakigsandurot.

“Ato pod ni sila nga gina utilize nga makatabang nato aron pod sa pag report kon unsa pod ilang namatikdan nga dili maayo nga makatabang sa pag maintain sa atong peace and order sa atong lugar,” dugang sa opisyal.

Matod ni Dugan nga kon basehan lang dinhi sa Sugbo, way mga kagubot.

Giangkon usab sa hepe sa kapulisan sa Lapu-Lapu, Police Colonel Clarito Baja nga dako usab og kahimoan ug ikatabang ang mga Muslim sa mga operasyon sa kapulisan.

Sa ilang bahin, ang pangu sa Muslim community sa syudad, Abdulla Pabilla, nipasalig nga andam sila nga makigtinabangay sa kapulisan sa pagsumpo sa mga krimen nga buhat sa mga terorista.

“Kon naa may daotan nga trabaho, dili gyud ta mopasulod ug mga dautan, mga ngil-ad og trabaho ug huna-huna dili gyud ta. Dili lang sa Lapu-Lapu...maningkamot mi ug makalaom mo ug makasalig mo nga kaming mga kaigsuonang mga Muslim nga amo gyud barugan nga maningkamot mi aron makab-ot gyud ang kalipay ug kalinaw sa atong nasud”, matod ni Pabilla.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph