DILI bangi sa fraternity ang hinungdan sa pagdunggab-patay sa usa ka sakop sa Tau Gamma Phi sa lungsod sa Compostela niadtong Sabado sa kaadlawon, Agusto 10.
Matod ni Police Captain Ian Macatangay nga ilang gisubay sa pagkakaron ang angulo sa away personal sa biktima ug sa suspek nga ilang gipaubos sa imbestigasyon kung unsa kini.
Giklaro usab niya ang una niyang gibutyag sa Superbalita Cebu nga sakop sa Alpha Kappa Rho ang biktima nga si Lenie Ochea Noval sanglit miyembro kini sa Tau Gamma Phi fraternity.
Samtang, ang suspek nga si Joshua Canlas taudtaod na nga miyembro sa Crips gang sa lungsod sa Compostela.
Una nang nadakpan sa gihimong follow-up ug manhunt operation si Canlas sa barangay Inayawan sa siyudad sa Sugbo apan ang mga kaubanan niini pabiling gawasnon sa pag suwat ning balita.
“Personal grudge pa ang among gitan-aw nga motibo, however kining iyang ka grupo wala mi kahibawo nganong nangapil ni gi usa-usa pa namog identify,” matod ni Macatangay.
Gisalikway hinuon sa hepe sa Cebu Provincial Police Office Police Colonel Roderick Mariano nga adunay mahitabong pag bawos sa duhak a grupo.
Matod niya nga dili mag-away ang grupo sa suspek ug biktima diin mahimo ra kini nga magtinabangay pagsulbad sa kamatayon sa biktima.
Mando niya sa mga imbestigador sa Compostela police station nga ilhon gyud nila ang lain pang mga kauban niini sa krimen. (AYB)