Maguindanaon giilang Hiyas sa Kadayawan ‘19

(Hulagway kuha ni Mark Perandos)
(Hulagway kuha ni Mark Perandos)

ANG dilag sa tribung Maguindanaon maoy gikoronahang Hiyas sa Kadayawan 2019, sa koronasyon nga gihimo, Dominggo, Agosto 11, sa RMC Petro Gazz Arena.

Ang 23-anyos nga si Nurainie Ampatuan ang miangkon sa titulo, gipildi ang laing napulo ka dalagang representante sa laing tribu dinhi sa Davao City.

Si Ampatuan nga kasamtangang nagsugod sa iyang kaugalingong clothing brand nga Hilyah Islamic Designs maoy gitanduan sa mga hurado nga moangkon sa titulo, tungod sab sa iyang aprub nga tubag.

“As a Muslim Filipino, my message to the next Hiyas sa Kadayawan is to never deny your background. We have the right to lead and influence the millennials, the power, and great responsibility. We should be proud of where we came from. Have self-confidence and be a good citizen in our country - our Philippines,” ang winning answer sa dalaga.

Gikoronahan sab nga Hiyas sa Panaghiusa si Coraima Hasim sa Sama Tribe ug Hiyas sa Kalambuan si Jessa Andian sa Bagobo Tagabawa Tribe.

Nakuhan sab ni Ampatuan ang Best in Cultural Presentation award.

Kinsa si Nurainie

Nahimugso ug nagdako siya sa Cotabato, apan pagka-2013 mibiyahe siya sa Davao aron dinhi magtungha.

Mikuha siya og dentistry sa usa ka semester, dayon mi-shift siya sa nursing.

Apan paglabay sa usa ka tuig ug usa ka semester, gidrop niya ang kurso tungod sa kahimtang niya sa panglawas.

Apan pabilin nga madasigon sa iyang pangandoy ang dalaga. Hangtud sa mikuha siya sa kursong Bachelor of Fine Arts Major in Fashion Design sa Philippine Women’s College of Davao ug nahuman niya kini sa nakalabay nga tuig.

Inubanan sa pagdasig kaniya sa iyang magtutudlo, nadasig si Ampatuan nga himuong inspirasyon ang iyang kagikan.

Dinhi, nahuna-hunaan niyang gamiton ang Inaul, usa ka tradisyunal nga Maguindanaon nga telang ginagamit sa paggama og gowns, long and short sleeved shirts, ug uban pa. (Uban ang report sa SunStar Davao)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph