DIGOS CITY -- Di pa matugkad sa Digos City Police Office (DCPO) ang motibo sa pagpusil patay sa lalaking nagdrayb og multicab, alas 4:30 sa hapon, Dominggo, Agosto 11.
Nailhan ang biktima nga si Kevin Alcazaren Zamora, 32, molupyo sa Purok 1, Barangay Sinayawan, lungsod sa Hagonoy, Davao del Sur.
Sa inisyal nga imbestigasyon sa kapulisan, nahitabo ang insidente sa dalang Rizal Avenue kanto sa Mary Crumb Street sa Barangay Zone 1 ning dakbayan.
Pauli na ang biktima kauban ang inahan niining si Evelyn, 59, nga nagsakay sa iyang gimanehong kolor orange nga multicab, nagbaton sa plakang MBA 647, dihang kalit nibutho ang duha ka mga lalaking nagsakay og motorsiklo.
Gihulagway sa mga nakasaksi nga ang angkas sa kolor yellow nga way plakang Yamaha Mio nga motorsiklo maoy nagpusil sa biktima makaduha ka higayon.
Gibutyag sa mga nakasaksi nga nakasul-ob ang gunman og kolor dirty white nga jacket, payaton ang lawas ug naka-face mask.
Wa na matabang sa Davao del Sur Provincial Hospital ang biktima human gideklarang dead on arrival sa mga doktor.
Hinuon, way tatsa ang inahan sa biktima.
Narekober sa crime scene ang duha ka basiyong bala sa gituohang 9MM nga pistol.
Mihimo na og lawom nga imbestigasyon ang kapulisan aron mailhan ang mga suspek ug makasohan. (Orlando B. Dinoy)