SIKOP ang idlas nga si Banakon, kinsa gituohang miyembro sa New People’s Army (NPA), atol sa gilusad nga manhunt operation sa awtoridad sa Davao Region alas 4:30 sa hapon niadtong Dominggo, Agosto 11, sa New Corella, Davao del Norte.
Ang suspek nailhang si Leonilo Gonzales Sumampong, alyas Kumander Banakon, 44-anyos, nagpuyo sa Purok 1, Barangay San Roque.
Gilusad sa awtoridad ang manhunt operation batok sa suspek gumikan sa patong-patong nga mga kaso niini.
Mga kaso sa suspek mao ang robbery, sedition, homicide, frustrated murder, attempted murder, murder, ug multiple attempted murder diin iya kining nahimo nga salaod sa Davao City.
“Idlas kaayo ni siya. After siya masikop, gi-turnover ni siya diri sa Davao City Police Office (DCPO) kay diri niya nahimo ning maong mga kaso,” sulti ni DCPO spokesperson, Police Captain Ma. Theresita Plaza-Gaspan.
Sumala sa DCPO nga gikonsidera nila ang suspek nga Most Wanted Person.
Sa kasamtangan, balhog ang suspek sa selda sa DCPO diin giproseso na sa Investigation and Detection Management Branch ang mga kaso niini didto sa korte. (Jeepy P. Compio)