SUPERBALITA CEBU

Ironman organizer gihangyo ni Mayor Chan

MAS malahutayong proyekto, sama sa pagtukod og tunghaan o sports facility, ang himuon sa organizer sa Ironman 70.3 nga bag-ong natapos niadtong Dominggo, Agusto 11.

Mao kini ang gihangyo ni Lapu-Lapu City Mayor Junard “Ahong” Chan bugti sa pa-host sa dakong internasyonal nga sports event.

Kaniadto, ang organizer sa Ironman nipahipayon og pagpanghatag og school supplies ug feeding program sa mga tunghaan ug kabarangayan.

Sukad sa tuig 2012, ang dakbayan sa Lapu-Lapu maoy host sa naasoyng kompetisyon nga sagad salmotan tiriathletes nga gikan sa dul-an 60 ka mga nasod matag tuig.

Giangkon sa mayor nga nakatabang ang Ironman sa turismo sa dakbayan pinaagi sa promotion.

Pinaagi sa naasoyng kompetisyon, mas naila ang maanindot nga mga beach sa dakbayan lakip na usab ang mainitong paghangop sa mga Opnonganon sa mga langyawng atleta nga makita sa pagpunsisok sa katawhan sa mga dalanna agian sa lumba.

Nakapasaka usab kini sa revenue ug bookings sa mga hotel ug resort sa dakbayan sumala ni Chan.

Apan gawas niini, wala na makakuha og laing revenue ang dakbayan gikan sa naasoyng kompetisyon sanglit wala sila pabayra sa syudad ug buhis o ba kaha fee sa ilang pagpahigayon sa naasoyng kompetisyon.

Mibayad hinuon, matod pa, ang mga organizer sa naasoyng kompetisyon og P80,000 sa ilang pagtaod og mga banner mahitungod sa kalihukan sa dakbayan.

Gawas niini, wala na silay lain gibayran sa dakbayan.

“Kanang mga banner naa tay taripa ana, banner ra gayud wala nay tax, free tanan pag-agi sa bridge pag-agi sa kuan free na,“ matod ni Chan.

Karong tuiga ang dakbayan, migahin og P9 Milyones isip tampo sa naasoyng kalihukan sama sa pagpahigayon ug “carbo loading” ug welcome party sa mga atleta, pagpahigayon ug mga kalingawan alang sa event ug ang pagkuha usab ug mga cheerer atol sa kompetisyon mismo.

Gihulagway hinuon kini ni Chan nga gamay ra ang naasoyng budget itandi sa P15 Milyones nga budget sa miaging tuig.

Karong tuiga wala na mo-sponsor ang kagamhanan sa dakbayan ug mga atleta sukwahi sa miaging katuigan gumikan sa kagamay sa budget.

Wala na usab sila moabaga sa fireworks human sa kompetisyon apan giingong giabaga kini sa laing mga pribadong kompaniya pinaagi sa solicitation.

“Mura raba’g gi promote ang City of Lapu-Lapu is hosting a world class events, bali ang atong makuha ana sa city advertising ra gyud ug promotion mao ra jud ato ana,” pagpasabot ni Chan. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph