KON wala pa napugngan, posibleng usa ka kilo nga shabu ang ihulog sa mga durugista ngadto sa lungsod sa Cordova atol sa ilang kapistahan, niadtong Dominggo, Agusto 11.
Kini ang gitug-an ni Police Major Orlando Carag Jr., human ilang nasuta sa gihimo nga background check sa duha ka durugista nga napatay sa kapulisan sa syudad sa Talisay niadtong Sabado sa kaadlawon, Agusto 10.
Sa dihang giingong unang namusil ang grupo nila NI Jorge Malinao.
Si Malinao ug usa ka Dixon ‘Dickson’ Pacaldo ang namatay dihdiha dayon, samtang nitahan ang usa ka Rolando Dacayana.
Matud ni Carag, ang hepe sa Talisay City Police Station, nga lakip sa drug watchlist sa Talisay police si Malinao, lumad nga taga Lanao Del Norte, kinsa una nag-abang sa usa ka subdivision sa barangay Cansojong, Talisay.
Apan giingon nga nibalhin kini ngadto sa panimay nga iya kang Dacayana, sud pa lang sa usa ka semana, apan sa gihimo nga pakisusi, nasuta nga taudtaod na sa maong lugar si Malinao ug kauban niini nga sila si Dacayana ug Pacaldo.
Gipasabot ni Carag nga ang informant sa Cordova Police, kinsa naila lang sa panga’n nga ‘Michael’, usa usab ka tiggamitan sa drugas, ug giingong gisugo unta ni Malinao nga maoy motabang sa pag-apud-apod sa ilegal nga drugas sa Cordova atol sa piyesta.
Apan giingon nga nakonsensya hinungdan nga didto sa Cordova Police Station kini nisumbong.
Gihimo dayon ang transaction alang sa usa ka buy bust, hinungdan nga nipatabang ang Cordova Police ngadto sa Talisay City Police Station.
“Ang isa sa area of operations nya (Malinao), isa sa binabagsakan nya, ang Cordova. Ang Cordova police nag-coordinate sa atin, humingi sila ng guide,” saysay ni Carag.
Gitug-an usab ni Carag nga usa sa mga operatiba sa Cordova Police ang naigo sa pagsinukliay og bala tali sa mga suspek ug sa mga pulis sud sa dul-an 20 minutos.
Swerte na lang nga giingong’ sa bullet vest naigo ang bala ug wala nakalapus sa lawas ang bala.
Kahinumduman, ang duha nga sila si Malinao ug Pacaldo ang patay dihadiha sa pinusilay tali sa kapulisan human posibleng nakamatikud nga pulis ang ilang ka-transaction.
Gikataho nga ang duha mao ang unang namusil.
Nakuha sa crime scene ang duha ka 38 kalibre nga armas, mga bala, 42 ka mga gagmay nga pinakete sa shabu ug drug paraphernalia.
Gaduda ang mga pulis nga uban sa mga ebidensya, lakip na ang cellular phones sa mga suspetsado ug ubang drugas, ang gilabay ngadto sa may tubigan nga napuno sa mga water lily, diin usab nila napalgan si Dacayana. (FMD)