NASAPON sa Regulatory and Complaint Board (RCB) ang menor de edad nga nagtambay ug nanigarilyo sa usa ka tindahan sa M.H Del Pilar Street, dakbayan sa Cagayan de Oro.
Nasayran nga gikatahong gapamaligya ang maong tindahan ngadto sa mga menor de edad ug estudyante apan gipanghimakak niini atol sa operasiyon sa RCB ug gani gihangyo pa kini nga mokooperar ilabi na alang sa mga kabataan.
Gibutyag ni Antonio Resma Jr., inspectorate team leader sa RCB, nga gi-isyuhan og notice of inspection ang tindahan human nga gitudlo sa menor de edad nga maoy gabaligya kaniya og sigarilyo.
“Nag issue kita sa tindahan reported man to gibalikbalikan gani to nato ang tag iya moigon nga wala gabaligya, naglingkod lingkod man siya nanigarilyo atong gipangutana nganong nanigarilyo asa nipalit, miingon siya wala gabaligya, ang minor gitudlo man siya,” matud ni Resma.
Gidugang pa nga ang mensahe niini sa mga patigayon nga dunay balaod ang dakbayan nga gipatuman ug angayang sundon.
Posibleng mag-atubang sa multa nga P5 mil ang maong patigayon sa pagpamaligya sa menor de edad.