GIMUGNA na sa lokal nga kagamhanan sa dakbayan ang task force batok sa dengue kini human nga nisaka ang ihap sa kasong dunay dengue ug duna nay namatay diri sa dakbayan sa Cagayan de Oro.
Ang task force gilangkoban kini sa Office of the Committee Affairs, Presidente sa Liga ng mga Barangay, Department of Education (DepEd), Department of Interior and Local Government (DILG), City Local Environment and Natural Resources Office (Clenro), City Information Officer (CIO) ug City Risk Reduction Management Office (CRRMO) nga gipangulohan sa City Health Office.
Gibutyag ni Dr. Fe Bongcas, officer sa City Health Office, nga tumong niini nga mahunong na o mapugngan ang grabe nga pagsaka sa ihap sa dengue sa nagkadaiyang dapit sa siyudad ug ang task force ang motutok niini. Gidugang pa nga kini dili lang usab sa dengue apan lakip na usab sa bisan unsa nga kalamidad nga atubangon ang i-apil sa pagplano sama sa baha, linog ug uban pa.
“Hopefully, kini nga task force nga atong nahimo this would be a working task force ang function gyud ani to oversee tanan, whole Cagayan de Oro mag-identify mi sa among responsibilities,” matud ni Bongcas.
Gidugang pa nga magporma na ang task force og incident command system ug tan-awon ang komposisyon sa task force nga kinahanglan representahan mismo sa ulo sa usa ka buhatan.
Samtang, nibutyag si Dr. Ramon Nery nga importante kaayo ang gimugna nga task force tungod kay bulan pa lang sa Agusto ug mas motaas pa ang kaso sa dengue sa mga mosunod nga bulan.
“Kini nga task force nga atong gai-form karon very important gyud ni kay statistics show that by August mas motaas pa gyud ang incidents and the following months, August-September kung if we will be doing the same thing we will be having the same results,” matud ni Nery.
Gidugang pa nga kung dili maghimo og “extraordinary intervention” mas motaas pa kini tungod kay mao na kini ang sumbanan ug makita usab nga mas taas karon ang ihap sa kaso sa dengue kumpara sa nilabay nga mga tuig.
Nagpahimangno ang mga kadagkoan sa Department of Health ug sa City Health nga kinahanglan nga batasanon ang pagpanglimpyo o ang 4-o’clock habit lakip na usab ang pagsul-ob og mga tag-as sama sa longsleeves, pajama ug paggamit og moskitero ug mga insect repellent nga lotion.