HUMAN mapili nga deputy speaker sa Ubos Balay Balauranan bag-ohay lang, na-elect usab si Kongresista Pablo John Garcia isip bag-ong bise presidente sa National Unity Party (NUP) Visayas atol sa national convention sa partido niadtong Agusto 6, 2019.
Ang kongresista sa ikatulong distrito sa Sugbo maoy usa sa pipila ka mga miyembro sa Kongreso nga nitukod sa NUP niadtong Pebrero 2011.
“I’m happy to be back working with the party that I helped nurture since its infancy,” pahayag sa batan-ong deputy speaker, sa press release nga gipagawas niadtong Lunes, Agusto 12.
Matod niya, giimbitar siya sa mga co-founder sa NUP nga motabang sa partido.
“And for me, it was an opportunity to be part of a smaller group where I could influence party decisions and shape party positions,” dugang ni Pablo John sa text message sa Superbalita Cebu.
Si kanhi deputy speaker Pablo Garcia, amahan ni Pablo John ug Cebu Gobernador Gwendolyn Garcia, ang founding chairman sa NUP. Kini niserbisyo sa national party gikan sa 2011 hangtod sa 2013.
Nipasalig si PJ nga iduso ang legislative agenda ni Presidente Rodrigo Duterte labi na ang economic ug revenue measures aron mapundohan ang libre nga edukasyon ug social services.
Ang NUP ang usa sa mga dominante nga partido sa House of Representatives nga dunay sobra sa 50 ka mga miyembro.
Apil niini sila si Congressmen Wilfredo Caminero sa segundo distrito ug Vincent Franco “Duke” Frasco sa ikalimang distrito ingon man Congresswoman Janice Salimbangon sa ikaupat nga distrito.
Gawas ni Pablo John, napili usab sila si Ronaldo Puno, kanhi secretary sa Department of Interior and Local Government isip chairman sa NUP; Rep. Elpidio Barzaga sa Dasmariñas, Cavite, isip presidente sa partido ug Manila Mayor Francisco Domagoso o mas nailhan nga Isko Moreno isip vice chairman for political affairs. (SCG)