BISAN pa man sa mga batikos nga nadawatan sa Regulatory and Complaint Board (RCB) gikan sa mga nasapon nga nag-carshots o nag car-tambay mas hingusgan pa niini ang operasiyon.
Gitakdang magtagbo ang RCB ug ang Cagayan Town Center (CTC) aron nga mahisgutan ang maong isyu.
Gibutyag sa Inspectorate Team Leader sa RCB nga si Antonio Resma Jr., nga magpadayon ang ilang operasiyon batok niining mga nagtambay ug nag-inom sa sakyanan tungod kay hugot kining ginadili.
“Di na pwedi i-allow maka create siya og saba kay ilang gipamusic ang mga sakyanan so naay public disturbance nga mahitabo ang atong gilikayan is civil disobedience kay naay mga balaod nga kailangan nato i-comply and they are promoting civil disobedience,” matud ni Resma.
Nanghinaot si Resma nga mosunod sa balaod sa siyudad ang mga patigayon kung dili mapugos sila sa pag-implementar sa mga multa o bisan diha sa pagpasirado apan giklaro niini nga dili sila anti-business ug igo lamang gipatuman ang mga regulasiyon ug giprotektahan ang mga Kagay-anon.
Nasayran nga nagpagawas usab ang CTC og pahayag ilabi na pahibalo nga padayon pa gihapon ang Car tambay apan ginadili ang mga ilimnong makahubog.