Vendors namalik sa Colon

USA ka semana human ang Prevention, Restoration, Order, Beautification and Enhancement (Probe) nihawan sa dan Colon, mga sidewalk vendor namalik na sa ilang mga pwesto apan ubos na sa mas estrikto nga pamalaud.

Gikan sa kapin 200 ka mga sidewalk vendor, katunga na lang kanila ang nakabalik kay ang uban kanila wa makatuman sa mga rekisitos.

Kini sama sa barangay clearance ug consent form gikan sa mga establisemento diin sila nagplanong mobutang sa pwesto.

Laing rekisito kinahanglan sila nga rehistradong botante sa Dakbayan sa Sugbo.

Si Raquel Arce, pangu sa Probe, niingon nga sagad sa mga vendor nga nakabalik mao kadtong mga sakop sa Gugmang Alyansa Sumbanan sa Asenso (Gasa).

Ang Gasa usa ka programang ubos sa Office of the Mayor nga maoy nagpatuman sa mga polisiya sa sidewalk vending sa Cebu City.

Nipirma usab ang mga vendor og mga saad aron organisado ang ilang pagpaninda.

Sa ilang implementing rules, si Arce niingon nga ang vendors gitugtan lang nga makapaninda og walo ka mga oras sa matag adlaw, silay modumala sa ilang mga stall, di makadala og menor sa pagpaninda ug gidili ang paggamit og liquefied petroleum gas o butane.

Laing gidili mao ang pagbutang og dagkong mga payong, di paggamit og sobra sa usa ka cool box, gidili ang paggamit og folding bed o banig sa pag-display sa mga tinda.

Sila usab ang palimpyuhon sa ilang mga pwesto ug mobahig sa basura.

Pabayron usab sila og P10 matag adlaw sa City Hall.

Karon, gimandoan usab sila nga duha lang ka vendors ang makabaligya matag haligi sa building.

Apan matod ni Arce nga dunay mga higayon nga sobra sa duha ka vendors ang gustong mopwesto. Wa kini nila gitugot.

Kon gusto sila, magsabot sila og schedule nga magpuli-puli sa oras kay wa gitugot ang pagsawo og pwesto.

“It’s prohibited if another vendor will use other vendor’s place,” tataw ni Arce.

Tag two-feet by two feet ra usab ang pwesto nga gihatag kanila, dugang ni Arce.

Kadtong makalapas, nagkahulogan nga masuspenso og usa ka semana.

Kon makaupat na nakalapas, mawagtangan sila sa ilang stall ug di na makapamaligya sa Cebu City.

“We’re giving them chance. If they cannot comply then it’s not the government’s fault anymore,” matod ni Arce.

Sukad namalik ang vendors sa pagpamaligya niadtong Agusto 9, 2019, si Arce niingon nga duha na ka vendors ang nakalapas sa rules nga nakaingon sa ilang pagkasuspenso og usa ka semana.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph