NAGPATABANG sa Anti Cyber-Crime Group 7 ang upat ka mga babaye ug duha ka mga lalake human mabiktima sa double your money scheme nga gipaagi sa social media sa managlahing mga kompaniya.
Matod ni alyas Marimar, ni-invest na siya sa usa ka foreign exchange company, lehitimo nga foreign exchange market.
Apan gihaylo siya sa iyang higala nga mosulod usab sa laing kompaniyang mohatag og 100 percent nga ginansya sulod lang sa 15 ka adlaw.
Nisuway siya ug sa iyang pagduki-duki sa Facebook page nga Phoenix Trading, nakita niya nga daghan ang naka payout sulod lang sa duha ka semana.
Usa ka Ailen Villazar nipaila nga maoy player.
Si Villazar giingon nga nipasalig nga ang ilang kwarta nga gi-invest sa Phoenix Trading isulod sa laing forex trading.
Gibutyag ni Villazar nga ang nagpundo sa kwarta mao si Joseph San Jose, giingong negosyante. Sa unang mga semana sa Hulyo, naka-payout pa siya hangtod nga iyang gipangdoble ang investment.
Iya pang gipang-recruit ang iyang mga kabanay.
Nag-promo pa sulod sa duha ka adlaw ang Phoenix Trading nga madoble ang ilang kwarta sulod sa pito ka adlaw.
Apan human nila nahatag ang kwarta, gipang-block na silang tanan sa group chat.
Dinhi na natarantar ang mga naka-invest tungod kay di na makita ang account sa Phoenix.
Sila nagduda na nga nabiktima sila sa scam.
“Since July 1, times 2 in 15 days, unya pagka human gimubo niya in 7 days. Before siya nawala, nagpromo siyag 2 days nga times 2 for seven days. Nya wala na dayon nabalik,” matod ni Marimar.
Samtang ang labing dako nga naka-invest mao si Julia, adunay online business, taga sityo Cabantan, Barangay Mabolo, Dakbayan sa Sugbo.
Moabot og P462,000 ang iyang na-invest.
Matod ni Julia nga nailad na siya kaniadto sa usa ka investment scheme apan gusto siya mamawi sa nawagtang niya nga kwarta.
Ang nabilin niya nga capital nga kita sa iyang negosyo online iyang gihapak sa Phoenix.
Nabutang siya sa batch 50 nga sa unang 15 days naka payout pa siya. Apan sa mosunod nga mga semana wa na silay mabayri.
Mibalik pa sa pag-communicate kanila si Ailen aron ipahibawo nga nabiktima siya ni Joseph San Jose nga nadakpan na sa kaulohan sa susamang modus.
Tungod niini nangayo siyag tabang nga mabawi sa mga investor ang kwarta pinaagi sa pag hulog sa laing capital kaniya.
“Pagka sunod batch, wala na siya mohatag sa kwarta namo. Didto na nag-start. Nya nangayo siyag backup funds aron ma-refund mi, nagsige sad mig backup. Hangtod nga na-scam na gyud, wala na gyud,” matod ni Julia.
Gipresentar nilang Marimar ug Julia ug mga kauban ang mga dokumento lakip na ang identification ni Villazar sama sa Bureau of Internal Revenue (BIR) ID nga naka address sa General Trias, Cavite.
Apan ang nakapaduda nila kay aduna kini laing dokumento sama sa pasaporte nga ang iyang address sa Maragusan, Davao.
Samtang usa usab ka trabahante sa health insurance company nga taga siyudad sa Mandaue nireklamo usab kay nabiktima sa double your money.
Si Mark Balugo nagkanayon nga naka-invest siya sa Positive Life times 2 ug gihaylo nga ang kwarta nga iyang i-invest diin sulod sa unom ka adlaw ma doble ang kwarta.
Mahimong modawat ang Positive Life Times 2 og Gcash ug BDO cash card apan human mapadala ang kapin sa P60,000 nga kwarta, gipang block na silang tanan.
Nagpaila ang ing gireklamo nga usa ka Karen Tan nga giingong founder sa kompanya nga giingong nagpuyo sa Baguio City.
Apan usa sa mga biktima ni-hack sa Facebook account ni Tan ug dinhi nasuta nga dummy lang kini sa suspek nga naila sa ngan nga Airen Himungala.
Natululan na nila asa nagpuyo nga maoy gusto nila nga madakpan.
“Sa akoa lang, ang nahatag nako P60,000. Nya ang uban naay taga Manila ug taga Davao nga na scam. Ang malas niya kay naay duha taga Cebu naka tultol asa iyang balay, asa pud nag trabaho iyang bana,” matod ni Balugo.
Ang PNP Anti Cyber Crime Group 7 mikuha sa tanang impormasyon sa mga reklamante alang na sa pagpasakag kaso batok sa mga suspek.