GITABONAN og wooden paneling ang buhatan ni Kongresista Paz Radaza sa ikaduhang andana sa Lapu-Lapu City Hall kagahapon sa hapon, Agusto 12.
Matod ni Atty. James Sayson, legal officer sa Lapu-Lapu, ang pagtaptap sa buhatan ni Radaza gipasubay sa nakuha ni Mayor Junard "Ahong" Chan nga legal opinion gikan sa Department of Interior and Local Government (DILG).
Sumala sa opisyal sa DILG, si Chan maoy mas dunay katungod sa City Hall ug walay mahimo si Radaza kon magdumili ang mayor sa paghatag kaniya og espasyo.
Dugang ni Sayson, ang ordinansa usab nga gisandigan ni Radaza alang sa pagpabilin sa buhatan sa kongresista sa naasoy nga dapit depektuso o kwestiyonable.
Una nang gikataho nga gikuwestiyon sa kampo ni Chan ang ordinansa sa buhatan ni Radaza nga usa sa mga ulahing napalabang sa bumiyaay nga mayor ug karon napiling kongresista sa Lapu-Lapu ug giingong wala usab mapublikar sa mantalaan.
Gibutyag ni Sayson nga makahimo og sulod ang staff ni Radaza sa naasoyng opisina kung adunay kuhaon nga mga dokumento apan kinahanglan nga makig-coordinate sa City Legal Office (CLO).
Gawas sa naasoyng katuyoan dili na gayud sila tugotan pa nga makasulod sa opisina sanglit ubos na kini sa buhatan sa mayor.
Sa miaging Biyernes, Agusto 9, giingong gipadad-an na usab ni Chan si Radaza og notisya sa pagbiya na sa iyang kasamtangang opisina sanglit nadawat na nila ang legal opinion gikan sa DILG.
“There’s a process that we will observe tomorrow (August 13). That’s one thing we will discuss of they reach out to our office kay gibutang man sa order ni Mayor nga kung naa silay kuhaon kinahanglan makabawo ang office of the city attorney so we will just devise a scheme nga ug naa silay ipagawas mapagawas nila,” matod ni Syason.
Si Radaza sa iyang bahin nasurprisa ug mikwestyon sa gibuhat nga lakang ni Chan sa iyang opisina sanglit aduna pa kini pending nga kaso sa korte.
Tulo ka mga indibidwal nga nailhang sila si Teobanes Patalinghug, Humprey Elvira ug Abzyl Bechayda ang mipasaka og kasong annulment sa city ordinance No. 14-200-2019 batok kang Radaza ug mga kaalyado niyang konsehal sa Regional Trial Court RTC Branch 70.
Ang maong ordinansa maoy gisandigan ni Radaza sa iyang padayong pag opisina sa ikaduhang andana sa city hall.
Iya usab nga gihulagway nga usa lang ka opinion ang suwat nga nadawat ni Chan gikan sa DILG ug dili usa ka order sa pagpahawa kaniya sa iyang kasamtangang opisina.
Alang kang Radaza ang usa ka opinion dili makapawalay-bili sa ordinansa nga naghatag kaniya og katungod sa pag-opisina sa iyang kasamtangan buhatan.
Iyang gimandoan ang iyang staff sa pagpadayon sa ilang trabaho.
“But then again we are almost used to surprises from our Honorable Mayor, with all these he seems has the tendency to abuse, pero magpadayon atong serbisyo sa katawhan mao na nga I instructed them (staff) to just continue to work,” matod ni Radaza.