DAGHAN ang na-intriga sa gisulti ni PRRD nga mahimo nga modawat og regalo o donasyon ang kapolisan.
Midugang si PNP Chief Oscar Albayalde nga mahimo nga modawat og regalo o donasyon ang kapolisan basta walay “strings attached.”
Buot ipasabot, mahimo nga dawaton sa kapolisan ang ihatag kanila basta walay pakapin nga kabubut-on.
Ahem.
Mahimo ba kaha nang mohatag ka sa kapolisan nga way kapin nga kabubut-on?
Kinsa may nasayod kon may pakapin ba o wala?
Husto ba nga isulti lang nga kinasing-kasing lang ang maong paghatag?
Daghan ang naglibog niini.
Kon buhaton gyod kini, mahimo na nga normal o natural na lang sa kapolisan nga modawat og butang gikan sa katawhan, sama sa litson baboy o uban pa nga mga lamiang pagkaon o kaha, kwarta.
Basta lang “walay pakapin nga kabubut-on.”
Mahimo na nga apil kanunay sa mga hangyo nga atong ipaabot sa kapolisan kanang gitawag og donasyon nga “way pakapin nga kabubut-on.”
Maanad o kaha magsalig na ang kapolisan nga kon dunay ipabuhat kanila, duna gyoy butang o kwarta nga ihatag kanila pagka-human.
Mahimo na nila nga langay-langayon ang pagbuhat sa angay nila buhaton kon walay ihatag kanila. Unahon na sab nila pagbuhat ang hangyo sa mga tawo nga makahatag kanila.
Labi na kon ilado sa katawhan ang mohatag niini.
Maayo lang pod ning kinaiya nga mohatag sa kapolisan sa mga tawo nga dunay ikahatag. Apan makaluoy ang ubang tawo nga way ikahatag, sama sa mga pobre.
Hain kahay maayo nga dili pausohon ang paghatag og butang o donasyon?
Lain na lang ang ihatag kanila.
Unsa man?
Mahimo nga mohatag og “commendation” o pasidungog ngadto sa mga kapolisan nga dunay importante nga gibuhat alang sa katawhan.
Mas maayo pa kini kay sa mohatag og butang o kwarta.
Ngano man?
Dili mausab ang relasyon sa katawhan ngadto sa kapolisan tungod kay bisan kinsa mahimo man nga mohatag sa maong pasidungog, ma dato o ma pobre.
Gawas pa niini, ang pasidungog nga ilang madawat magamit sa kapolisan alang sa ilang promosyon sa trabaho.
Mosaka ang ilang rangko, modako pa ang ilang sweldo. Makalipay kini kanila, hasta sab sa ilang pamilya.
Unsay hinungdan nga misaka man ang insidente sa dengue sa atong nasod?
Nganong daghan na man ang nasakit sa dengue?
Mao kini ang mga pangutana nga nangita og tubag.
Matod pa sa usa ka eksperto sa maong sakit, duna siyay duha ka butang nga nakita nga posibling rason sa pagkuyanap sa maong sakit.
Unsa man kini?
Una ang pag-usab usab sa panahon o climate change.
Ikaduha ang naghuot nga katawhan sa mga lugar nga dili limpyo.
Dinhi sa Pilipinas, dili kaayo init, dili sab kaayo bugnaw. Mao kini ang panahon nga moangay ang lamok nga nagdala sa sakit nga dengue.
Midugang pa siya nga tungod sa pagka-daghan sa katawhan karon, makita ang panagdasok sa katawhan sa mga lugar nga kulang sa kalimpiyo. Dali ra kaayo mosanay ang maong klase nga lamok sa maong lugar.
Unsay mahimo sa atong kagamhanan niini?