MOKABAT ngadto sa P8.1 million nga balor sa ilegal nga drogas ang nasakmit sa mga kapulisan sa siyudad sa sugbo atol sa usa ka buy-bust operation sa Sitio Villa Remedios, Barangay Kalunasan, kaganihang alas 5 sa hapon, Agosto 13, 2019.
Ang nasikop giila nga si Raffy Abaya, 23 anyos, lumad nga taga Sitio Laguna Barangay Lorega San Miguel apan kasamtangang nag puyo sa maong lugar kung asa siya nadakpan.
Mga sakop sa Drug Enforcement Group-Central Visayas (DEG 7) nga gipangulohan ni P/ Lieutenant Colonel Glenn Mayam nga inabagan sa Philippine Drug Enforcement Agency 7 (PDEA 7), City Intelligence Branch (CIB) ug City Drug Enforcement Unit (CDEU) sa Cebu City Police Office (CCPO) maoy nipahigayon sa maong buy bustoperation.
Moabot sa 1.2 kilos nga gidudahang shabu ang ilang nakuha gikan ni Abaya.
Matod pa ni Mayam nga mipalit unta silag 200 gramos nga gituohang shabu gikan sa suspek sa wala panila nasikop kini ug narekobre ang usa ka kilong shabu.
Miyembro sa usa ka dakong drug group si Abaya nga milutaw ang pangalan human sa mga dakop sa kapulisan sa nanglabay nga mga buwan.
Gipaubos nila sa surveillance si Abaya sulod sa usa ka buwan usa sila mi lusad sa buy-bust operation.
Gipaubos na karon sa imbestigasyon si Abaya alang sa pagsusi kung asa magkuhaan sa iyang supply sa ilegal nga drogas.(AYB)