Pinaksitay sa game 5

HUMAN matabla ang serya, 2-2, ensaktong pinaksitay ang gipaabot nga masaksihan karong gabii sa dihang, sa makausa pa, magtigi na usab ang San Miguel Beer ug TNT Katropa sa Game 5 sa Philippine Basketball Association (PBA) best-of-seven finals sa Araneta Coliseum.

Ang Katropa misamit sa Game One, 109-96, apan muna sa ginhawa kining nabawsan sa Beermen, 127-125, sa duwa nga miagi og duha ka overtime.

Sa Game Three, bangis nga misulod sa korte ang Katropa ug yano na usab kini nga milampaso sa San Miguel, 115-105.

Apan sa Game Four niadtong Dominggo, gabii diin giharos sa TNT ang individual awards human napiling Best Player of the Conference si Jayson Castro, samtang best import usab si Terrence Jones, nakalabni og suprisang kadaugan ang Beermen, 106-101.

Ning duwaa, si coach Leo Austria migamit sa formula nga nakapahimo nilang kampiyon sa niaging upat ka season.

Kini mao ang pagtutok sa ilang opensa ngadto sa higanting Sugboanon nga si June Mar Fajardo kinsa mipabaha og 22 puntos, 10 niini sa third quarter diin siya maoy miduslit sa 12-0 nga rally sa SAN Miguel.

“June Mar was able to play comfortably inside and that’s what we need from him,” matod ni Austria nga nakutloan sa Spin.ph. “The players understand what made us a great team in the past few years.”

Gipaabot nga ang Beermen mogamit sa susamang formula karong gabii aron, sa unang higayon ning, malabni ang bintaha sa nagpadayon nga serya.

Apan si Jones, sama usab kang Castro, masaligon ug determinado nga ilang malangkat ang kadaugan karong gabii nga maoy magyawe sa ilang pultahan paingon ngadto sa kampiyonato.

“We’ve really worked hard as a team to put ourselves in the position to have the No. 1 seed, and just build chemistry and believe in one another from Day One. So it was just, you know, a great opportunity to reach all the achievements, and we still got one more to go,” padayag ni Jones kansang asawa usa ka Filipina.

Sa kasaysayan sa PBA, sukad niadtongt 1994, kini maoy ika-11 nga higayon nga ang usa ka team maoy miharos sa best player of the conference ug best import award sa usa ka conference.

Sa niaging napulo nga kini nahitabo, walo niini ang nakampiyon, ug ang uwahi mao ang San Miguel niadtong 2017 Commissioner’s Cup diin si Chris Ross ang BPC ug si Charles Rhodes ang best import.

Ilang gipildi ang TNT, 4-2, niadtong higayona.

Niadtong 2014, ang Talk N’ Text maoy milabni sa maong mga awards human si Richard Howell maoy na best import ug si Castro ang misakmit sa BPC award.

Apan niadtong higayona, ang Katropa napildi sa San Mig Coffee sa best-of-five finals, 3-1.

Nahitabo usab kini sa San Miguel Beer niadtong 2010 Fiesta Conference. Si Jay Washington maoy nahimong BPC ug si Gabe Freeman ang best import apan napildi sila sa Alaska sa Finals, 4-2.

Pangutana. Mahimo ba kaha nga ikasiyam nga ang TNT sa team nga miharos sa individual award ug mao usab ang nakampiyon?

O dili ba kaha mahibalik ngadto kanila ang nahitabo niadtong 2014 diin sila ang mihakot sa duha ka awards apan wala siya ma-champion?

Kini maoy atong mahibaw-an sa nahabiling tulo na lang nila ka duwa. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph