MAS dako pa og kalampusan nga nahimo si Manny Pacquiao kon itandi ngadto ni Floyd Mayweather, Jr.
Kini maoy gipabuhagay ni Sean Gibbons, ang usa sa mga inpluwensiyal nga personalidad sa natad sa boksing sa tibuok kalibutan.
Si Gibbons maoy nahimong guest sa senemanang Philippine Sportswriters Association Forum nga gipahigayon sa Amelie Hotel sa Ermita didto sa Kaulohan.
Iyang gipasabot nga ang 62-7-2 ni Pacquiao mas maayo pa sa 50-0 ni Mayweather.
Si Gibbons kinsa usa ka international matchmaker mao usab ang nagsilbing presidente sa MP Promotions ni Pacquiao.
Iyang gipadayag nga bisan og sabton sa uban nga aduna siyay pagdapig ngadto sa fighting senator, apan siya mismo sa iyang kaugalingon nagtul nga gilupig ni Pacquiao ang limpiyo nga record ni Mayweather.
Usa sa gitumbok ni Gibbons mao ang away ni Pacquiao niadtong Hulyo 20 didto sa Las Vegas diin gipildi sa 40 anyos nga fighting senator ang 30-anyos nga si Keith Thurman. Kadto maoy unang kapildihan ni Thurman sa iyang 30 ka away.
Gisaysay ni Gibbons nga unsay nahimo ni Pacquiao sa niaging tuig, makatugbang na kini ngadto sa nahimo ni Sugar Ray Robinson ug busa silang duha ang matawag nga duha ka greatest fighters sa kasaysayan sa boxing.
Dugang niyang pasabot mao nga sa edad nga 40 anyos, si Pacquiao padayon nga nagkulit og kasaysayan ug walay bisan usa nga nakahimo niini.
Ni Gibbons pa, nga si Floyd maoy permi mosakay sa pangalan ni Pacquiao kansang legasiya nagkadako ug nagkadako samtang kang Floyd nagkahinayhinay og papas.
Gani hangtod karon, si Pacquiao padayon nga nagselebrar sa iyang kadaugan ug posibling moaway kini og balik sa unang semana sa sunod tuig.
Giangkon ni Gibbons nga gitinguha gyud ni Pacquiao nga makig-rematch ni Mayweather, apan kon dili kini mahitabo dunay pipila nga kapili-an nga makontra niini. Tinuod nga ang 42-anyos nga Mayweather, wa pa makaangkon og kapildihan, apan ang iyang mga uwahing kadaugan napuno sa mga pagduda. (JBM)