BIRI, Northern Samar - Minilyon nga kantidad sa ilegal nga drugas napalgan sa baybayon sa Barangay Pio Del Pilar ning lungsod, Sabado, Agusto 10, 2019.
Sa qualitative ug quantitative test sa Regional Crime Laboratory, positibo nga shabu ang drugas nga napalgan sa usa ka mananagat.
Sa pagtimbang sa Philippine National Police Crime Laboratory, miabot og 9.71 kilos ang shabu nga nagkantidad og P66 milyunes base Dangerous Drugs Board (DDB) value.
Matod ni Police Regional Office (PRO) 8 Director Dionardo Carlos, usa ka mananagat nga wa pa niya panganli ang nakakita sa plastic bags sa baybayon sa Sitio Pagul.
Ang lima ka dagkong putos sa shabu gitugyan sa maong mananagat ngadto sa kapulisan sa Biri alang sa pagsusi.
Base sa datos sa PRO8, kini ang labing unang higayon nga dunay nasakmit nga shabu nga naglutawlutaw sa kabaybayonan sa Eastern Visayas.
Bisan kon wa pa mahibaw-i sa kapulisan diin gikan ang dakong kantidad sa shabu, ilang gisaad nga mohimo sila og lawom nga imbestigasyon niini.
Gimandoan ni Carlos ang iyang mga station commander nga magpatrolya sa kabaybayonan aron dali nga makuha ang ubang kontrabando.
Gisiguro ni Carlos sa taga Eastern Visayas nga luwas gihapon ang rehiyon ug giklaro niya nga wa nay mga sindikato sa ilegal nga drugas ang naglihok.
Gidayeg ni Carlos ang maong mananagat sa pagpartisipar niini sa kampanya sa gobyerno batok ilegal nga drugas. (JKDP)