CALBAYOG City, Samar - Kapin sa 50 ka mga sakay sa usa ka pasaheroang motorbanca naluwas human naunlod ang ilang gisakyan, Lunes, Agusto 12, 2019.
Base sa report sa Philippine Coast Guard Eastern Visayas, ang motorbanca MB Mia Romcis nalunod sa kadagatan sakop sa Barangay Aguit-itan ning siyudad.
Ang nalunoran naay gilay-on nga 100 metros gikan sa pantalan sa Calbayog.
Dugang pa sa report nga nibiya ang bangka sa Calbayog City paingon unta sa Tagapul-an, Samar.
Sakay niini ang 49 ka mga pasahero ug pito ka mga tripolante.
Sa 49 ka mga pasahero, dunay mga bata nga nag edad 6, 4 ug 2 anyos ug dunay hamtong nga 82 anyos.
Maayo pa ang sa panahon sa pagbiya nila pantalan.
Apan sa dihang nilayo na sila, kalit nga nikusog ang hangin ug dagko na ang bawod.
Tungod sa kadagko sa bawod, nisud na ang tubig dagat hinungdan sa pagkalunod.
Nakasul-ob pa hinuon sa life jacket ang mga pasahero.
Tanan nga mga sakay sa bangka pulos mga taga Tagapul-an, Samar.
Pasado alas 11 sa buntag, nadawat sa mga awtoridad ang report hinungdan nga dali nga gipadala ang mga rescue team.
Niresponde ang taga Coast Guard, Maritime Group, City Disaster Risk Reduction and Management, kapulisan ug Lite Ferries crew sa area.
Naluwas ang mga sakay g gialalayan sa mga rescue team nga mapahimutang.
Ang Coast Guard mohimo pa og dugang imbestigasyon.
Sa miaging buwan, sunod sunod nga insidente sa mga nalunod nga bangka ang naitala sa Southern Leyte.