AHOS nga gitusok sa stick ug gibitay sa baba sa water bottle nga giingong pangsumpo sa mga lamok nag-viral karon sa social media.
Apan kining giingong lamok o mosquito repellent makaingon diaysa pagdaghan sa ang lamok sa inyong tugkaran.
Tungod sa nagkadaiyang taho kabahin niining kaso sa dengue sa nasod, nagkadaiyang mga alternatibo ang gihimo karon sa publiko aron malikayan ang makamatay nga dengue virus.
Apan ang Department of Health (DOH) 7, nipahibawo nga way pagtuon kabahin niini ug dili usab sila makasulti kon epiktibo kini.
Si Dr. Ronald Jarvik Buscato, dengue program coordinator sa DOH 7, nagkanayon nga way pagtuon niini nga matang sa alternatibo ug dili usab sila morekomendar niini.
Dugang niya nga tungod kay naa kini tubig sulod sa botelya, basin mao na hinuon kini ang itlogan sa lamok nga maoy rason nga modaghan kini sulod sa balay.
Mosaka pa
Samtang gipaabot nga posibleng mosaka ang kaso sa dengue sunod semana ug sa Nobiyembre kon di mapugngan sa ilang gihimo karon nga interbensiyon sama sa pagpalimpyo sa palibot.
Kini ang nakitang trend o projection nga nakita sa DOH 7 base sa datus sa Agusto 8.
Matod ni Buscato nga anaa karon sa ika-unom nga dapit ang rehiyon sa tibuok nasod sa gidaghanon sa mga kaso samtang anaa ang rehiyon sa ikalimang dapit sa gidaghanon sa namatay.
Aduna nay natala nga 11,865 ka mga kaso ang natala ug adunay 78 ang nangamatay sukad Enero hangtod Agusto 8 ning tuiga.
Nag-una gihapon ang lalawigan sa Sugbo sa gidaghanon sa kaso nga adunay 7,246. Kini gisundan sa lalawigan sa Bohol (2,271), Negros Oriental (2,220) ug Siquijor (128).
Kadaghanan gihapon sa mga masakit o makakuha sa sakit nga dengue nag-edad og 6 ngadto sa 10 anyos. Kini gisundan sa edad uno ngadto sa singko anyos.
Padayong awhag ni Buscato ang hugot nga pagpatuman sa 4S batok sa dengue. (HBL)