NIABOT na og 33 ka mga estruktura ang naguba sa demolition team gikan sa 74 ka mga balay nga nagbarog sa yuta nga gipanag-iya sa University of the Philippines (UP) Cebu nga nahimutang sa sityo Avocado, Barangay Lahug, Dakbayan sa Sugbo.
Si Sheriff Rey Enolpe nagkanayon nga adunay 74 ka defendants batok sa UP nga gipasakaan og kasong “forcible entry” human nibalik og tukod ang kanhi mga okupante pinangulohan sa ilang homeowner president nga si Eliseo Gulfan Jr. human nasunog ang ilang mga balay niadtong Disyembre 29, 2015.
Si Enolpe nitug-an nga aduna pay 41 ka estruktura nga ilang gub-unon sa mosunod nga mga adlaw.
Mohimo pa siya og progress report nga iyang iduso ngadto sa Regional Trial Court (RTC) Branch 23 nga maoy niisyu sa writ of demolition.
Dugang sa court sheriff nga ang pagguba sa 74 ka mga estruktura mahuman kon mohukom ang UP sa pagpadayon sa demolition. Matod ni Enolpe nga ning semanaha ilang gihunong ang demolisyon.
Ang mga balay nga sagad ginama sa concrete materials nagbarog sa 4,000 metro kwadrado nga gipanag-iya sa UP, ubos sa Transfer Certificate of Title (TCT) No. 31166 nga adunay lot No. 911 B2 C2 E.
Ang mga lumolupyo nga apektado ningduso og motion for reconsideration apan gisalikway sa korte hinungdan nga nahinayon ang demolition.
Gipadayag ni Vice Mayor Michael Rama nga way husto nga relocation site nga sarang kapuy-an sa mga apektado sa demolition sa Lahug.
Matod pa ni Rama, atol sa iyang privilege speech, nga napatuo ang korte nga dunay relocation site nga andam na kabalhinan sa mga lumolupyo base usab sa certification sa Presidential Commission of the Urban Poor.
Apan matod ni Rama nga ang lugar sa Barangay Busay way hustong karsada, linya sa kuryente ug tubig nga apil sa rekisito sa relocation site.
Gisaysay usab ni Rama nga atol sa iyang duha ka termino isip mayor, iyang gipatuman ang no relocation, no demolition.
Siya nagtuo nga ang City Government adunay daghang matabang para sa mga apektadong lumolupyo. Siya nanawagan sa mga departamento sa City Hall sama sa Department for the Welfare for the Welfare of the Urban Poor (DWUP), Department of Engineering and Public Works (DEPW), Department Social Welfare and Services (DSWS) ug uban pa sa pagtabang sa mga lumolupyo.
Ang DWUP pinangulohan ni Sim Romarate niandam sa Gawad Kalinga building sa barangay Lorega para kapuy-an temporaryo sa mga apektado samtang wa pa sila makabalhin.