TAGUM CITY -- Sagad kitang makadungog og reklamo labot serbisyo sa pipila ka ahensiya sa gobyerno nga hinay o langan, luyo sa panawagan sa nasyunal nga kagamhanan nga hatagan sa episyente, kalidad ug paspas nga pagtubag sa ilang concerns ang publiko.
Sa atong paglibot-libot sa rehiyon, ug pagbasa-basa sa online, gidala ang atong atensiyon sa pipila ka positibong reaksiyon nga nadawat sa Social Security System (SSS) Tagum Branch sa Gaisano Grand Mall, Apokon, Tagum City.
Daghan ang mibilib sa paspas nga serbisyo ilabi na sa tellering division sa buhatan.
“We implemented changes, according sab sa mandate sa presidente nga paspas nga service, aron paspas sab ang kada transaksiyon dinhi,” ni Hildebrando S. Ortega, ang Acting Tellering Section Head sa Tagum Branch sa pakighinabi kaniya.
Suma pa, di sayon ang mga gihimong kausaban, ilabi na dakong adjustment ang pagabuhaton subay sab sa suporta sa ubang empleyado sa departmento.
Niya, maayo na lamang nga dasig ug suportado sa tagsa-tagsa niya ka sakop ang gitumong nilang “World Class Payment Facility.”
“I think it’s the first time sa tanang branches sa SSS ug happy mi kay nakita namo ang ka-effective niya. Malikayan na ang taas nga linya for we implement new schemes sa pagbayad.”
Nasayran nga una ka makasud sa tellering section sa SSS Tagum Branch moagi una ka sa information desk nga maoy mogiya kanimo sa pag-fill-up sa form.
“We make sure nga dili sila magbalik-balik, nga inig sulod nila kumpleto ilang forms, aron sab di na maghuwat og dugay,” dugang ni Ortega.
Subay niini gipatuman sab sa branch nila ang “Ambassadors & Ambassadress” diin sila mismo mga personahe moabi-abi sa members, mohatag kanila og giya unsa ang ilang buhaton sa ilang concerns.
Luyo niini, naghimo sab ang tim ni Ortega og instructional video gamit ang pulong nga Binisaya aron mas sayon nga sabton sa mga kliyente niini.
“Nagka-ideya kami to put up a video on what are the first thing nilang himuon para ma-guide sila. It’s produced sa Binisaya kay kabalo ta dili tanan makasabot gyud sa English.”
Tungod sa ilang World Class Payment Facility, wala nay dugay nga pagpaabot sa linya.
Sa datus gikan sa buhatan, halos libu ang maserbisyuhan nilang kliyente sa matag adlaw, gikan Lunes ngadto Biyernes nga operasyon.
“Nagput up sab ta og fast lane, ug naa sab tay Bayad Center diri para gyud masiguro ang faster service sa public.”
Ni Ortega di man kalikayan nga usahay mogastos sila sa kaugalingon nilang kwarta sa pagpalit sa ubang himan nila sa operasyon, apan wa nila kini igsapayan tungod nangandoy silang mahatagan sa tiunay nga serbisyo ang publiko.
“Di gyud malikayan na we spend from our pocket, but we do it because we want what is the best sa atong mga members.”